Qour’aan-e-Kareem

Qour’aan-e-Kareem c’est le livre d’Allah Ta’ala ki fine révélé graduellement selon le contexte et nécessité pendant ene période de 23 banané. C’est le livre le pli authentique ki na pena aukene doute la dans ki garanti le salut éternel pou tout ceki applique li dans so la vie. Selon ene hadice de  Nabi ‎(Sallallaahou A'laihi Wasallam)‎, c’est ça la base du progrès.

Tanque ki banne musulmans fine reconnaite so valeur et fine applique li, zotte fine toujours prospéré. Le déclin de la communauté fine commencé à mesure ki li fine néglige li. Donc pas pou ena progrès sans retourne vers Qour’ann-e-Kareem. C’est ene façon pou dire ki c’est nou même ki responsable ça situation ki nou pé vive zordi jour. Nou fine détruire nou même par quitte Qour’aan-e-Kareem. Nou fine ena le temps pou conne lire tout livre sauf Qour’aan-e-Kareem. Nou fine toujours perdi nou la vie divant ça dajjaal télévision-là pou guette banne kaafir faire tout sorte grimace et empoisonne nou l’esprit et l’esprit nou banne zenfant avec banne doctrine satanique. Et ça Qour’aan-e-Kareem là fine reste fermé et gardé lors l’armoire et pé encore attane kikene mort pou capave gagne ene miaji vine lire li.

Faudré pas nou blié ki c’est ene grand destin pou dimoune ki fine apprane lire Qour’aan et pé lire li tous le jours et pé applique li aussi d’après so capacité. C’est vraiment ene l’honneur ça. Malheureusement banne musulmans fine trouve zotte prestige dans apprane et conne lezot zaffaire au lieu Qour’aan-e-Kareem. Mais pourtant Nabi ‎(Sallallaahou A'laihi Wasallam)‎ fine qualifié la personne ki apprane et ki enseigne Qour’aan-e-Kareem de meilleur parmi tous.

"Meilleur parmi ou c’est celui ki appane Qour’aan et ki enseigne li." (Boukhari)

Ki Allah Ta’ala donne nou yaqeen et croyance ferme lors ceki so Nabi ‎(Sallallaahou A'laihi Wasallam)‎ fine dire. Ameen !

[Extrait de Al Jamiat Vol.5 No.3]