Couma zenfants …

Quand ou lave ene zenfant li ploré, li crié couma dire ou pé faire li grand misère. Mais pourtant ou pé mette li dans propre. Li pena l’esprit. Acoze ça du bien ki ou pé faire li, li couma ene difficulté ki ou pé donne li.

C’est ene l’attitude ki ene dimoune continué ena li ziska li vine grand. Mais cette fois-ci dans ene l’autre façon.

Quand ou dire li arrête faire mauvais et prend chemin masjid, li trouve pou en colère avec ou. Quand ou dire li habille bien et pas habille indécent, sans hésitation et sans donne le temps li dire ou vieille ou zafaire. Ou dire li arrête vive avec so missié parceki so missié fine fini donne li so 3 talaaq. Là ou vine mauvais parceki d’après li ou pé tire li depi dans so bien-être. Et pourtant ou pé empêche li vive dans colère Allah Ta’ala et ou pé mette li dans propre. Mais li pas conne tout ça-là. Li conne zisse ça dounia-là. Li pencore trouve la nécessité bâtir so aakhirat cote li ena pou vive pou tout le temps.

Coumsa même li pas trouve bon quand ou dire li pas faire khutbah jum’ah en créole. Pourtant ou pé invite li vers le chemin ki fine tracé par Rassouloullah ‎(Sallallaahou A'laihi Wasallam)‎ et ki fine présenté en pratique par entier l’oummah depi banne Sahaba-e-Kiraam ziska zordi. Mais li prend ça pou ene causerie. Bé si ça li ene causerie même, li pas nécessaire ki ene dimoune dérangé vine faire li. Faire li par ene cassette ou ene vidéo cassette. Coumsa ene seul dimoune pou sufi pou entier l’île.

Si ou faire ça, ou même ou pas pou lé croire ceki banne après pou faire. Acoze ça arrête faire couma zenfants.

… Nette couma ti baba

Dimoune rode qualité lors qualité solution ou détergent ki pou tire tache lors linge ou bien lors figure. Et pou ça li pas hésité dépense gros gros somme la monnaie. Malgré ki li continué échoué, li pas arrête dépensé. Ena ene solution ou détergent ki bien efficace ki pas laisse aukene tache. C’est istighfaar et tawbah ki nettoye ou de banne péché et vine propre nette couma ti baba.

[Extrait de Al Jamiat Vol.5 No.5]