Secret

Secret li reste ene secret quand personne pas conne ça apart ou. Couma ene deuxième dimoune conne ça, li nepli reste ene secret. Li fini vine en publique, quand même ça publique-là li représenté par ene seul individu de publique. Aster pas atane ki ça pou reste entre zotte deux. Ça dimoune ki ou fine dire ou secret, li pou ena ene l’autre camarade intime ki li pou faire li part de ça secret-là et ainsi de suite. Pou arrive ene stage cote tout dimoune pou conné mais ava croire li encore ene secret. C'est-à-dire tout dimoune pou conné mais forcé-forcé zotte pas pou cause ça dans ene l’assemblée. Ou pas bizin en colère quand ou arrive conné ki ça camarde ki ou ti dévoile ou secret avec li, li fine fanne ça partout parceki si ou même ou pas fine capave garde ça dans ou ventre, pas attane personne pou faire li. Le coupable no 1 c’est ou même.  Aster ou bizin accepté ceki pou arrive ou. Necque faire tawbah et dimane douah avec Allah Ta’ala parceki li tout seul capave tire ou depi dans ça pétrin-là.

Et pas blié ki faire péché li grave même. Mais ça péché-là li pli aggravé quand ou raconte ou banne camarade péché ki ou fine faire. Pourtant Allah Ta’ala fine cachiette ou. Mais ou fine dévoile ceki Allah Ta’ala ti garde ça ene secret.

D’après ceki Nabi ‎(Sallallaahou A'laihi Wasallam)‎ fine dire, Allah Ta’ala pas pardonne ene dimoune coumsa. C'est-à-dire ene dimoune ki raconte so péché ki li fine faire, li pas gagne la volonté pou dimane pardon. Alors Allah Ta’ala pas pardonne li. C’est manque de pudeur ki faire ene dimoune agir coumsa. Coumsa même li bien pas bon ki ene dimoune raconte banne camarade ceki passé entre li et so madame quand li alle dans ménage. Banne madame aussi zotte faire ça bêtise-là. Banne camarades aussi zotte prend ene grand plaisir dans écoute ça banne kitchose-là. Selon ene hadice ki trouve dans Sahih Mouslim, Nabi ‎(Sallallaahou A'laihi Wasallam)‎ fine dire :

"Dimoune pli indigne au près d’Allah jour Qiyaamah, c’est ene dimoune ki alle dans ménage avec so madame et après ça li raconte tout kitchose cachiette ki fine passé entre zotte."

Si ça pas bon et li bien bien grave, alors eski li pou permette filmé banne scènes pareille ? Eski li pou permette guette ça banne films-là ? C’est banne dimoune dans bassesse même ki pou faire ene bêtise pareille. Pli bas ki ça c’est ça dimoune ki faire ça avec so propre madame ki pou vine mama de so banne zenfants.

Quant à nikah, li continué reste ene secret d’après Shariah tanque li reste entre missié et madame. Si fine faire ça divant necque ene seul dimoune aussi, là aussi li considéré comme ene secret d’après Shariah. Et d’ailleurs c’est nom de dire ki appelle li nikah mais en réalité li pas ene nikah. Et personne pas fine vine halaal pou so partenaire par ene nikah pareil. Et ça qualité nikah-là ki appelle nikah touffé et li pas valable. Pou ene nikah compté, bizin faire li en publique. Et so minimum c’est faire li divant deux missié ou bien divant ene missié et deux madames. Là li pas touffé ni li ene secret d’après Shariah. Li ene nikah valable.

[Extrait de Al Jamiat Vol.5 No.8]