Deviné ki sanla moi !

Mo pena aukene parfum agréable dans moi. Au contraire mo ena l’odeur bien pas bon. Mo passe dans la main tout qualité dimoune. Dimoune trappe moi couma zotte gagné. Zotte capave trappe moi avec zotte la main ki ena la boue, du suif, disang ou bien kit impureté. Jamais zotte pense pou lave zotte la main pou attrape moi. Et malgré couma mo été, zotte pas hésité pou cachiette moi dans zotte poche cotte zotte le cœur..

Mo passe dans la main banne dimounes ki capave ena banne maladies contagieuses. Malgré ça mo assez heureux ki dimoune pas hésité prend moi et garde moi avec zotte. Zotte pas peur ki zotte capave attrape kit maladie. Au contraire zotte extra content moi. Si zotte gagne pou faire choix entre moi et ene joli photo de zotte bien-aimé, zotte pou choisir moi. Tellement zotte content moi, zotte accepté pou casse relation familiale avec zotte banne proches acoze moi. C’est moi ki zotte content. C’est moi ki zotte rodé et zotte la vie fini derrière mo même. C’est mo même ki appelle billet Rs 2000, billet Rs 1000, billet Rs 500 etc. Si dimoune content moi, c’est acoze ki zotte croire mo capave faire zotte gagne tout ceki zotte bizin. Ça ene ti considération-là li couvert tout banne défauts ki mo ena. Malheureusement dimoune pas fine assez conne moi. Zotte fine lève mo grade plis ki bizin. En réalité mo pas capave donne zotte tout ceki zotte bizin. Mo capave faire zotte gagne banne moyen de confort mais pas le confort li même. Mo pas capave donne zotte la santé, la tranquillité et le bien-être. Sinon aukene le roi pas ti pou mort.

Ça kitchose ki capave faire gagne ça, c’est Razaa-e-Ilaahi ou bien le plisir d’Allah Ta’ala. Quand Allah Ta’ala satisfait avec ou, ou fine gagne tout. Dimoune accepté moi malgré mo banne défauts sous l’impression mo capave donne zotte tout. Mais ça li trouve dans Razaa-e-Ilaahi. Pou gagne Razaa-e-Ilaahi, ou bizin accepté toute sorte difficulté parceki ceki ou pé rodé li trouve là-dans même.

[Extrait de Al Jamiat Vol.5 No.8]