Dans même bateau

Ena tout qualité dimoune lors la terre. Ena ki bon et ena ki mauvais couma ena ki impé bon et impé pas bon. Mais malgré ça diversité-là nou tous nou dans même bateau. Banne dimoune ki dans ene bateau pas capave reste insensible avec problèmes banne dimounes ki pé voyage dans même bateau avec zotte. Bizin ena l’esprit de coopération. Chakene bizin essaye résoudre problème so camarade couma chakene bizin agir en sorte ki ça pas perturbe le bien être so prochain sinon li pou ranne li même ditort et li pou faire lezot souffert.

Nabi ‎(Sallallaahou A'laihi Wasallam)‎ fine donne ene l’exemple pou démontré ça l’idée-là. D’après ene hadice, ça li couma dire ene bateau ki ena deux compartiment. Ene là-haut et ene au fond. Si banne ki au fond zotte commence fouille fond bateau pou gagne de l’eau et banne ki là-haut zotte montré zotte insensible à ça, alors là-haut enbas zotte tous pou noyé. Ça montré ki si quelque chose de mauvais pé déroulé dans la société, alors c’est le problème de tout un chacun. Sinon tout pou paye le conséquence.

Faudré pas ene dimoune pensé ki li libre pou faire ceki li envi. Parceki so liberté li capave néfaste pou lezot. Imagine ene coup si chaque chauffeur lors volant li croire ki li ena liberté roule so l’auto avec vitesse ki li envi et dans coté la rue ki li envi, alors ki pou arrivé ? Ene dimoune sensé et intelligent pas pou tolère ça jamais. Et c’est ene principe ki accepté par tout un chacun au niveau international. Donc ene dimoune li libre dans so mouvement et so activité tanque ki ça li pas néfaste pou lezot.

C’est par ça même optique, ene dimoune li pas libre pou li faire péché parceki péché li invoque la calamité divine. Et quand ça vini, li pas vine necque pou ça dimoune ki fine commette ça péché-là. Pareil couma si ene dimoune fouille ene trou dans ene bateau, alors pas necque dimoune ki fine faire l’imbécillité-là ki noyé. Tout dimoune lors ça bateau-là pou noyé. Donc personne pas bizin senti li libre pou faire ceki li envi. Bizin toujours prend lezot en considération.

[Extrait de Al Jamiat Vol.5 No.9]