Mkjj

Maal (richesse), Kamaal (maitrise), Jamaal (beauté) et Jalaal (la grandeur) c’est ça même banne kitchose ki dimoune rodé dans dounia et derrière ça banne kitchose-là même ene dimoune li fini so la vie mais c’est ene vérité ki pas capave compte lors narien là-dans. Ça même appelle dounia et ça dounia-là li temporaire. Donc tout kitchose ki trouve là-dans li temporaire. Pena narien ki pou reste pou tout le temps avec ene dimoune.

Soutien ou aide ki ene dimoune capave pé gagné depi n’importe ki source li temporaire. C’est ene fait ki tout dimoune ena so problème. Personne pena le temps pou résoudre problème lezot lors ene base permanent. Et si kikene ena le temps aussi, li ena banne empêchements.

Pena personne dans ça dounia-là ki capave content ou plis ou mama-papa. Mais zotte aussi zotte ena ene limite ki zotte pas capave dépassé. Ena certaine kitchose ki zotte pas pou capave faire pou ou malgré zotte ena volonté pou faire. Malheureusement bien rare la volonté et la capacité marche ensam cote a cote. Donc mama-papa aussi zotte pas pou capave faire tout pou tout le temps. Donc lors ki sanla ou pou ena l’espoir ki li capave épaule ou partout ?

…La richesse

Dimoune li fier acoze so richesse et so du bien. Mais tout le temps nou fine trouvé li alle necque avec quelques mètres la toile blanc quand li quitte dounia. So l’auto, so la famille ou so banne proches, zotte necque accompagne li ziska so Qabar. Et parfois ça aussi zotte pas capave faire. Du bien li ene kitchose ki pas reste tout le temps avec ene dimoune. Couma li vini, li conne aller aussi. La plupart du temps nou trouvé ki au lieu la monnaie servi nou, c’est nou ki pé faire so l’esclavage. Et finalement si li pas quitte nou, c’est nou même ki pou bizin ploye bagage.

Nou trop compte lors nou richesse, mais souvent des fois, ena banne problèmes ki pas capave résoudre avec richesse ki nou ena. Ene dimoune malade ki pena guérison, senti li incapable malgré so richesse parceki so richesse pas capave donne li la santé.

Ou richesse capave acheté ou banne moyens de confort mais li pena capacité ranne ou confortable ni li capave donne ou la tranquillité morale.

Ou capave acheté kikene ki pou faire semblant content ou acoze ou richesse mais ou pas pou capave gagne kikene so le cœur. L’amitié li pas ene kitchose ki acheté-vendé. Le cœur li ene kitchose ki capave tombe lors ene kikene ki reste dans ene la caze la paille quand même li capave pé faire semblant content ça kikene ki pé reste dans château. Donc richesse pas capave donne nou tout kitchose. Allah Ta’ala dire :

« … Si ou ti dépense tout ceki ena lors la terre, ou pas ti pou capave mette l’amitié ene pou l’autre dans zotte le cœur mais c’est Allah ki fine mette l’amitié entre zotte … » (V63 / S8) 

… La jeunesse

Zordi ou dans ou pleine jeunesse avec tout ou charme et tout ou l’énergie. Ou pé capave saute sept pied hauteur mais eski ou fine déjà calculé ki ene jour capave arrivé cotte ou pou trouve ou dans difficulté necque pou monte ene perron ? Ou capave ene gros le bras ki tout peur ou. Eski ou fine réalisé combien couma ou fine disparaite dans la terre ki pas trouve ene boute aussi. Eski ou ene exception ?

Namroud fine allé. Pharaon fine allé. Abou jahal fine allé. Abou Lahab fine allé. Combien l’exemple ou bizin pou ou rassuré ki ene jour ou aussi ou pou allé. Et peut être avant ou allé, ou pou gagne l’occasion trouve tout ceki ti ena dans ou, pé allé. Ou famille, ou camarade, banne médecins, médicaments et ou richesses, tout pou incapable divant la situation. Necque zotte pou trouve ou pé allé. Personne pas pou capave empêche ou allé.

Ou pas pou reste tout le temps couma ou été zordi avec tout ou charme dans ou. Cheveux pou vine blanc. La peau pou plissé et ramassé. Pas pou ena le dent dans la bouche. Aukene maquillage aussi pas pou prend. Et pas pou ena charme aussi pou faire tout ça-là. Tout ceki nou ena li temporaire. Donc félicitation pou banne ki fine donne zotte jeunesse, zotte l’énergie et zotte le temps dans ibaadat de zotte Rabb.

Finalement nou trouvé ki narien pas pou nou et narien pas pou servi nou. Tout pou tourne le dos. C’est necque Allah même, li tout seul, ki capave soutenir nou et protège nou tout le temps et partout. C’est li tout seul ki nou capave faire confiance. Li tout seul lors ki nou capave compté partout cote nou été. Li bon ki nou pense toujours ceki nou Nabi ‎(Sallallaahou A'laihi Wasallam)‎ fine dire :

« … Pense li (Allah), to pou trouve li divant toi… » (Tirmizi)

[Extrait de Al Jamiat Vol.5 No.13]