La sagesse dans propage Deen

Couperet pas fine faire pou coupe légume et couteau pas fine faire pou casse lezo. Nou bizin conné quand, couma, cote ça et ki bizin servi.

Allah Ta’ala fine donne nou la bouche pou cozé mais pas tout qualité cozé. Nou bizin conne servi li. Nou capave cause ene même cozé dans différent façon ki capave ena différent l’effet. Tanque possible bizin coze dans ene façon ki nou réussi dire ceki bizin dire sans ki li ena ene l’effet négatif. Bizin servi ene ton léger et poli en principe. Mais ena aussi ene l’heure ki dimane ene ton ene ti pé sévère couma parfois li pli sage garde silence. Faudré pas donne l’emphase lors ene kitchose ki donne l’impression ki li faraz quand en réalité li pas faraz. Et faudré pas aussi reste insensible à ene situation grave avec banne laissé-allé ki laisse paraite ki li ene zafaire simple.

Surtout quand zordi jour cote dimoune pencore conne banne kitchose de base dans Deen, li pas sage pou développe banne grand grand thèmes. Li couma dire pé donne banne ti zenfants mangé grand dimoune. Dans ça cas-là, apart faire gaspillage mangé, ça dégât ki li pou faire lors la santé zenfant-là li bien évident. Nou bizin conné couma, quand et ki bizin donne ki sanla.

Nou dans ene l’époque cote dimoune pas conné même banne kitchose de base couma wazou, ghussal, namaz, lecture Qour’aan-e-Kiraam, bonne manière et couma bizin vive avec so prochain. Plis ki ça, nou ena boucou pou travail lors nou propre imaan et prend impé tracas pou lezot aussi. Si nou commence traite banne thèmes stérile pou le plaisir de quelques uns, alors nou pou alle gaspille nou ressource et nou zeffort pou alle dans vide sans apporte quelque chose de bon et positif pou la communauté. Nou pou alle avec ene grand vitesse mais en direction opposé à nou destination. C’est voila couma nou pé éloigné de jour en jour malgré zeffort énorme.

D’abord bizin travail lor Yaqeen (conviction) dans aakhirat. Ça même c’était le principe adopté par Nabi ‎(Sallallaahou A'laihi Wasallam)‎. Si ça fine rente dans ene dimoune, alors tout kitchose pou vine facile. Sinon dimoune-là pou couma dire ene camion ki pé charié ene tank l’essence sans ki li capave bénéficié avec ene goute aussi depi là-dans. C’est parceki ene machine li pas roule avec l’essence ki li charié tanque ki ça pas vine dans so moteur. Coumsa même mille nou capave conné mais ceki pou faire agir c’est ça connaissance ki dessane dans nou le cœur. Donc la force motivatrice c’est imaan et yaqeen dans aakhirat. Et ça même zeffort bizin faire.

[Extrait de Al Jamiat Vol.5 No.14]