Gheebat

Gheebat signifié dévoile défaut ene dimoune derrière so le dos. C'est ene pratique haraam. D'après Qour'aan-e-Kareem, li couma dire mange la chaire ou frère ki fine mort. Et selon hadice de Nabi ‎(Sallallaahou A'laihi Wasallam)‎ c'est ene pratique ki pli grave ki l'intérêt et zina (adultère).

Mais dimoune pas conne so gravité. Acoze ça ena même banne bon dimoune aussi zotte trempé là-dans. C'est ene piège ki shaitaan servi pou dévalise surtout banne dimoune ki dans ibaadat. Avec boucou difficulté nou arrivé faire ene tigite ibaadat. Li pas sage pou alle perdi ça aussi dans vide. Et dans certaine cas pou alle doit aussi dans aakhirat. Et pou bizin prend péché lezot lors charge. Evite gheebat li couma dire empêche racine ene grand zarbre ki ena fruit gagne maladie.

Si jamais fine arrivé faire gheebat kikene, alors bizin faire tawbah et dimane Allah Ta'ala pardon. Si la personne ki fine faire so gheebat li au courant de ça, alors bizin dimane li aussi excuse. Si li pas conne narien, alors vaut mieux pas faire conné pou évite indispose li et mette li dans l'embarras.

Couma gheebat faire avec la bouche coumsa même gheebat faire par pèze lizié ou bien par signalé avec la main ou bien par imité. Par exemple ene dimoune li imite kikene pou montré couma li cozé ou bien couma li marché ou bien couma so la bouche ou bien so nené été. Coumsa même gheebat faire en écrit aussi. Tous banne moyens ki pou dévoile péché ou défaut ene dimoune derrière so le dos, li interdit.

Ena circonstance cote li nécessaire aussi dévoile défaut ki ene dimoune ena. Dans ça cas-là li pas interdit. Au contraire bizin faire li. Par exemple ene dimoune li oulé conne impé détail lors dimoune cote li pé envi avoye demande. Alors bizin averti li si ena kit manquement ou kit défaut ki capave ranne la vie mariage difficile. Mais faudré pas servi ça comme ene prétexte pou prend l'honneur dimoune, parceki li sacré ça. Celui ki mette la main lors l'honneur kikene, li expose li même à la colère divine.

Pardon O nou Rabb ! Protège nou !

[Extrait de Al Jamiat Vol.6 No.1]