… Quand ou ena Allah avec ou …

Ou content kikene. Et ou bien content li. Ou la journée commencé par cause avec li et li terminé aussi par ene dernier salaam ki ou faire li avant all dormi. Arrivé ou alle dans ene invitation. Ou trouve tout ceki ou ti voudré trouvé mais ou trouve ene seul kitchose manqué. Ena tout mais pena ça dimoune ki ou bien content li. Si vraiment ou content li, ou pou trouve ça l’assemblée-là ene l’assemblé bien bien fade ki pena l’ambiance.

Ca même arrive ene dimoune ki content Allah Ta’ala plis ki tout kitchose. Sans Allah, li senti li isolé et négligé malgré ki li capave bien entouré aussi. Par contre quand li senti Allah Ta’ala avec li, li senti li ena tout quand même li paraite ki li pena narien ditout. Ki ou bizin encore quand ou ena Allah avec ou !

Ene basse-cour rempli par des milliers volailles pas capave avance narien divant ene seul lion, quand même li ene vieux lion. Dans la même façon, nou bizin comprend ki entier dounia so soutien pas capave bénéfique dans aukene façon si necque Allah pas dans nou faveur. Par contre necque Allah so soutien li suffit ki dispense nou de entier dounia. A tel point ki ene dimoune li capave dans so bien être total sans ene dernier moyen de confort aussi.

[Extrait de Al Jamiat Vol.5 No.5]