Souhaite bonheur ou prochain

Bizin souhaite bonheur tout dimoune. Ceki ene dimoune gagné comme bonheur, li vine uniquement de coté Allah Ta'ala. Et Allah Ta'ala li pas diminué dans kikene so part pou donne ene l'autre so bonheur parceki acote Allah Ta'ala ça kitchose ki appelle 'manqué' là pas existé. Donc li inutile pou souhaite malheur kikene. Ene dimoune li attire so propre bonheur par souhaite bonheur so prochain. Afin ki le bonheur régné dans la société. Allah Ta'ala fine confié nou deux responsabilité : "Ordonne le bien et empêche le mal". Ordonne le bien afin ki ene dimoune pas reste privé de ene bonheur ki pé attane li. Et empêche le mal dans le but pou ene dimoune pas tombe dans malheur.

Montré banne moyens ki amène profits et avertir de banne kitchose ki amène défaite, c'est ene grand faveur ki ene dimoune capave faire à so prochain. Pli grand faveur ki ça c'est attire l'attention ene dimoune vers ene kitchose ki garanti li so bien être eternel. Dans ça sens-là, invite dimoune vers Imaan c'est ene pli grand faveur ki ene dimoune fine capave faire envers so prochain parceki Imaan même c'est le critère indispensable pou le succès total et le bien être eternel. Et banne ki fine engage zotte dans invite vers le bien et empêche le mal c'est ça même banne ki zotte sincère ki pé cherche le bonheur de l'humanité entier.

Par contre ene individu ou ene société ou ene régime ki tolère banne vices couma la boisson alcooliques, jeux du hasard, loterie, casino etc. c'est ene crime zotte pé commette envers l'humanité. So banne l'effet néfastes capave affecté et faire souffert ene futur génération ki pencore né aussi.

[Extrait de Al Jamiat Vol.6 No.2]