La loi divine barbare ?

Allah Ta'ala fine crée insaan libre. Allah Ta'ala fine dessane Deen pou chaque dimoune capave jouir so liberté parceki Deen li montré chakene so droit et so devoir. Dimoune ena tendance rode so droit avant exécute so devoir. Et ça aussi, li rode so droit plis ki li mérité et l'autre coté li néglige so devoir. Ça li amène li pou prive lezot de zotte droit. Alors bizin mette ene l'ordre pou personne pas faire personne souffert.

Pou ene dimoune capave vive en toute liberté et sécurité, li bizin senti li en sécurité en ceki concerne so la vie, so du bien et so l'honneur. Allah Ta'ala fine mette banne sanction ki alle ziska la peine de mort pou certaine délit afin pou garanti la sécurité de tout un chacun dans la société. Li pas par plaisir ki l'état islamique li applique ça banne sanction-là. Li pareille couma ene chirurgien ki ampute ene parti depi dans le corps ene patient ki capave endange so la vie. Li pas faire li avec plaisir mais zisse pou le bien être de so le corps en général li trouve la nécessité sectionne ene parti de li même. Et pou cela li mérite tout l'appréciation et félicitation. Et li pou être blâmé si li pas faire li.

Avant nou qualifié ene la loi de barbare, li nécessaire ki nou conné ki sanla ki fine etabli ça la loi-là afin ki nou évite déclare pli conné ou bien déclare conne ceki nou pas conné.

L'Islam li préconise la peine de mort pou ene dimoune ki fine prend la vie ene l'autre. Mais bien sur quand ça fine établi avec banne preuves et évidences ki pas laisse aukene doute. L'Islam li ena so banne critères pou accepté ou rejette ene preuve ou ene évidence. Mais l'essentiel c'est ki l'Islam li préconise ene sanction pareil pou ene criminel. Et l'Islam c'est ene mode de vie ki régi par la révélation divine en forme de Qour'aan-e-Kareem et ki fine exemplifié par nou Nabi ‎(Sallallaahou A'laihi Wasallam)‎. Ena pli barbare ki celui ki déclare la loi divine barbare ? Eh bien ene dimoune civilisé c'est quelqu'un ki vive dans l'obéissance du Créateur Suprême. Par contre ene ki tourne le dos, li dessane pli bas ki rang banne zanimau. C'est-à-dire ene degré pli enbas ki le barbarisme.

[Extrait de Al Jamiat Vol.6 No.2]