L’orgueil

Ene dimoune orgueilleux li bizin ene dimoune dans la bassesse même. Ene dimoune ki vraiment noble li pas capave ena ça vilain manière-là. Tout banne bon dimoune ki ça la terre-là fine charrié zotte lors so le dos, ti banne dimoune humble. Pena aukene bon dimoune ki ti ena ça dégoutant et indésirable manière-là. Et jamais dans l'avenir pas pou ena aukene bon dimoune ki capave ena li.

D'ailleurs en présence ça mauvais manière-là, ene dimoune pas capave vine bon quand même li capave paraite boucou bon.

Ki manière ene dimoune capave déclare li bon malgré ça mauvais manière-là quand tandis ki ça pou empêche li rente dans jannat ?

Dans ene hadice Nabi ‎(Sallallaahou A'laihi Wasallam)‎ fine dire ki ene dimoune ki possède l'orgueil dans so le coeur dans dimension ene la grain moutarde pas pou rente dans jannat. Ça même sufi pou montré so gravité.

Dans Qour'aan-e-Kareem, Allah Ta'ala dire :

« Ça l'autre le monde-là (aakhirat), Nou pou reserve ça pou banne ki pas content grandeur ni kit désordre lors la terre. Et le résultat final li pou toujours en faveur banne ki ena taqwa (piété). » (V83/S28)

L'excès de colère, vexation de temps à autre pou banne kitchose banales, la jalousie, égoïsme, manière cassé-rangé pou justifié ene kitchose zisse pou couvert frais, réticence pou accepté ene erreur ki fine faire, refuse accepté la vérité pou pas perdi point, déclare conné plis ki lezot, tous ça-là émane de l'orgueil. Ça li nécessite ene traitement pendant ene bon boute le temps sous supervision ene guide spirituel. Sans ça li pratiquement impossible pou débarrassé avec ça et li bien difficile gagne guérison de ça maladie-là. Bon-bon dimoune pas prend ça compte mais pourtant li bien bien nécessaire. Sans débarrassé de ça, dimoune pas vine dimoune quand même li capave paraite dimoune. Ça li faire dimoune dessane enbas niveau dimoune.

[Extrait de Al Jamiat Vol.6 No.3]