Ene façon pou corrige nou même

Souvent nou cause ene causé sans prend compte et pourtant li capave bien grave et blessant. Bizin toujours cause bien avec nou prochain. Li pas bon ditout pou offense kikene. C’est ene manière ki bizin corrigé. Li bien facile pou nou corrige nou si nou ena la volonté. Avant nou cause ene causé, nou bizin mette nou dans place ça dimoune ki nou ena l’intention adresse li. Coumaniere nou ti pou senti nou si dimoune ti dire nou ene causé pareil. Et dans ki façon nou ti pou content dimoune adresse nou et corrige nou si jamais nou fine faire kit erreur. C’est dans ça façon-là ki nou capave corrige mauvaise façon cause avec dimoune et nou capave amène ene l’équilibre dans nou.

Dans la même façon nou capave dresse nou façon agir avec dimoune. Si nou faire ça l’exercice-là pendant ene bon boute le temps, nou pou capave corrige ene bon parti dans nou. Sinon chakene pou abuse so camarade quand li gagne l’occasion et nou pou vive la loi du pli fort.

Et attention ! Pas pensé pou reste pareil tout le temps. Nou vive dans ene le monde cotte ferraille aussi li pourri. Donc chaque fort ena ene ki pli fort ki li et ça li change-changé. Ene ki fort zordi, li capave vine ene bagasse demain. Et ou pou subir ceki ou fine faire lezot subir. Acoze ça nou bizin pas agace kikene ou nuire kikene si nou envi vive en paix. Et pou gagne ça la paix-là, chakene de nou bizin corrige li même d’abord. Si jamais arrive kitchose ki pas bon, alors bizin faire zeffort et trouve ene moyen pou ça pas répété.

[Extrait de Al Jamiat Vol.6 No.8]