La caze zaraignée

Allah Ta’ala ena capacité faire tout kitchose. Narien pas impossible pou Allah Ta’ala. Li capave faire ene simple créature faire ene grand travail couma li capave faire ene moyen bien sophistiqué échoué dans ene simple travail. Allah Ta’ala fine détruire Abraha et so l’armée ki ti vine attaque ka’bah à travers ene ti zoizeau avec banne ti cailloux. Allah Ta’ala capave servi ene ti virus pou bouleverse toute ene pays. Quand Allah Ta’ala décidé, li capave faire ou monte lors pied coco couma ça fine arrivé dans banne pays cote fine ena tsunami.

Sans Allah Ta’ala aukene kitchose pena aukene la force. Banne ki cherche recours ou bien aide ou bien soutien ou protection ailleurs, alors ça li pas plis ki ene la caze zaraignée. Ene dimoune li ranne so situation fragile et li ranne li même vulnérable par tourne le dos avec Allah Ta’ala. Narien pas capave être bénéfique si Allah Ta’ala pas oulé. Mais c’est ene kitchose de imaan et de croyance. Dimoune ki ena imaan, li trouve ça vérité-là. Mais celui ki pena ça imaan-là, li pou toujours tente so chance pou améliore so la vie et li pou cherche recours ailleurs, même si ça nécessite néglige Deen et tourne le dos avec Allah Ta’ala.

Disons nou réussi gagne ceki nou ti envi gagné. Capave nou fine gagne richesse ki ena lors ça dounia-là. Bé si Allah Ta’ala faire nou vine ene cadavre vivant, alors ki nou pou faire avec ça richesse-là. Tout renfort, confort, lien, soutien apart Allah Ta’ala li représente quoi ? Allah Ta’ala dire :

« L’exemple de banne ki fine prend lezot comme allié ou protecteurs, li couma dire ene zaraignée fine faire ene la caze. Et certainement la caze zaraignée li la caze pli fragile ki ena si zotte ti conné. » (V41/S29)

C'est-à-dire couma la caze zaraignée li pas capave protège ene zaraignée, coumsa même aukene moyen pas capave bénéfique pou n’importe ki sanla ki fine tourne le dos avec Allah Ta’ala. Nou capave trouve li puissant et performant mais pou Allah Ta’ala li pas narien.

[Extrait de Al Jamiat Vol.6 No.10]