Deux problèmes

Nou ena 2 qualités problèmes. Ene problème dans dounia et ene 2eme dans aakhirat. Fodé pas nou essaye résoudre nou problème dans dounia par crée ene problème dans aakhirat. Li couma dire résoudre ene ti problème par crée 1 gros problème. Ou croire eski li ene bon l’idée pou nettoye la crache avec l’urine ! Mais dimoune li guette zis pou aster-là. Li pas calcule l’avenir. Li guette zis l’avantage temporaire quand même ça capave faire li souffert pou tout le temps. Ene dimoune ki fréquente banne ki ena la sagesse pas pou faire ene erreur pareil. Donc kifer na pas contacté ene dimoune ki conné et sage pou résoudre ou problème ? Ça capave faire nou résoudre nou problème sans crée ene l’autre pli grave.

Dimoune capave dimandé couma ça capave arrivé. Li facile pou comprend parceki quand ene dimoune néglige so Deen acoze ene l’avantage mondaine, alors absolument li pé résoudre ene simple problème par crée ene gros problème. Dimoune trop pressé. Sinon quand ene dimoune quitte ene l’avantage ki conte shariah, alors Allah Ta’ala donne li ene meilleur ki ceki li fine quitté. Par contre si li désobéir Allah Ta’ala dans résoudre ene problème, alors Allah Ta’ala mette li dans ene pli gros problème. Résoudre ene problème dans ene façon ki conte shariah, li pas ene solution. En réalité li ene moyen pou aggrave la situation.

[Extrait de Al Jamiat Vol.6 No.10]