Le problème faire qourbaani à l’extérieur !

Li pli bon ki ene dimoune li faire so qourbaani dans so l’endroit même parceki ena certaine pratiques ki bien recommandé ki li pas pou capave observé si li faire li ailleurs. Quand nou dire ki li pli bon, ça veut dire ki li permette faire li ailleurs aussi. Mais si acoze facilité et meilleur marché dimoune choisir pou faire qourbaani à l’extérieur et li prend ene grand l’ampleur, alors li possible ki nou arrête trouve ça pratique-là existé dans nou pays. Qourbaani li ene Shi’aar (emblème/symbole) de l’Islam ki bizin préservé. Donc li bien grave si li arrête existé. Acoze ça si kikene empêche faire li ailleurs, sans doute li pou ene zeffort très louable et appréciable. Mais en même temps nou pas capave dire ki ene qourbaani ki fine faire ailleurs li pas valable. Qualifié ene tel qourbaani de pas valable li pas valable.

Ene dimoune ki possède Rs 30 millions ena pou faire ene seule qourbaani. Coumsa même ene dimoune ki possède Rs 30000/- (valeur nisaab actuelle) aussi bizin faire ene seul qourbaani. Similairement ene dimoune ki pena ene sous dans so poche mais li ena banne zeffets et banne objets couma banne ustensiles, banne meubles etc. ki enplis de so nécessité de base et ki évalué plus ou moins à ene trentaine de mille, alors li aussi li bizin faire qourbaani. Aster ça millionnaire-là li pas senti même ça dépense ki li fine faire pou so qourbaani. Mais ça dimoune ki ena Rs 30000/- li pou senti li dur pou tire ene somme de 7 à 8 mille depi dans so l’économie. Et ça dimoune ki pena liquidité mais ki qourbaani frappé lors li, pou senti ça plis bien encore. Manque-manqué li capave pas faire li aussi. Dans ça cas-là si kikene propose li ene part qourbaani Rs 700 à l’extérieur, li pou ene gaffe ou bien ene mérite ? Pas tout dimoune ki nou capave propose li l’idéal. Ena aussi ene catégorie ki nou bizin contente nou avec l’essentiel de zotte part. Et ça catégorie-là si li pas majoritaire, li pas négligeable aussi. Li assez conséquent. Donc propose ene dimoune ene formule ki permette li acquitté de so responsabilité de qourbaani afin ki li pas coupable divant Allah Ta’ala, li bizin ene formule tolérable au moins.

Avec ça campagne empêche faire qourbaani à l’extérieur, ena ene bon nombre ki ti pé faire qourbaani pou arrête faire li aussi quand même d’après shariat zotte bizin faire li. Vaut mieux faire ene kitchose malgré avec ene certaine manquement ki pas faire li ditout même. Souvent dimoune faire ça erreur néglige l’essentiel derrière l’idéal. Faudré pas blié ki ena banne cas cotte banne dimoune fine réduire le nombre de parts ki zotte ti pé prend à l’extérieur. Donc ena fine reste sans faire qourbaani ki pourtant ti bizin faire. La sagesse exige ki nou cherche l’idéal tanque ki ça pas faire nou perdi l’essentiel même. Sinon nou bizin contente nou avec l’essentiel.

Le projet qourbaani à l’extérieur li ene moyen pou facilite bane ki pas motivé ou moins motivé pou faire qourbaani. Li ene moyen pou soulage banne ki pena ene surplus assez confortable de finance ou bien banne ki manque liquidité. Coumsa même ça capave servi banne jeunes filles de 13 ans, 14 ans, ou 15 ans ou plis ki possède bijoux et banne l’habillement surplus ene quantité ki faire zotte vine sahib-e-nisaab. C'est-à-dire ene quantité ki faire qourbaani vine waajib lors zotte. Mais zotte pas travail ni zotte ena kit revenue ni rente. Zotte encore pé étudié. Aster débouche 7 à 8 mille par la tète, li paraite assez difficile. Et si ene dimoune li travail tout seul et li ena deux trois jeunes filles dans ça genre-là, alors li pou pli dur encore. Donc ça projet-là li capave servi comme ene solution dans banne cas pareil.

Li pas appliqué pou banne bien possédé et bien motivé. Oui si zotte oulé faire qourbaani nafil à l’extérieur dans le but pou soulage banne ki dans difficulté, alors li pou ene très bonne idée. Donc bizin ena ene l’équilibre dans élabore le problème et dans propose ene solution. Bizin trouve ene moyen pou préserve la pratique de qourbaani au niveau local sans oublié propose ene solution à banne ki faible économiquement mais ki d’après shariah bizin faire qourbaani. Bizin trouve ene solution pou faire zotte gagne la volonté pou décharge zotte responsabilité. Si ena ene solution, tant mieux. Sinon ça projet-là li ene meilleur solution.

[Extrait de Al Jamiat Vol.6 No.11 & Vol.7 No.7]