Namaz janazah dans masjid

Li ene façon indésirable pou faire namaz janazah à l’intérieur masjid. Selon ene hadice rapporté par Hazrat Abou Hourairah ‎(Radiyallahou anhou‎)‎, Rassouloullah ‎(Sallallaahou A'laihi Wasallam)‎ fine dire :

« Celui ki faire namaz pou janazah dans masjid, alors pena narien pou li. » (Abou Dawood)

C’est ene hadice authentique ki assez claire pou montré ki namaz janazah à l’intérieur de masjid li ene pratique indésirable. Li vrai ki certaine ‘Oulama fine qualifié ça hadice-là de ene hadice faible acoze présence ene narrateur nommé Swaalih Maula Bin At-Taw-amah. Mais en principe li ene narrateur intègre et authentique. C’est necque dans so vieux jours ki li ti ena problème faire confusion. Quant à banne hadices ki li fine rapporté auparavant zotte correcte sans aukene problème. Aster bizin conné ki ça hadice-là ki l’époque so hadice ça. Ça hadice-là li rapporté par ene de so banne ancien zélèves nommé Ibn Abu Zi’b. Donc c’est ene hadice ki fine être rapporté bien avant dans l’époque ki li pas ti encore ena ça problème faire confusion-là. Selon Ibn Adi, banne hadices ki so banne ancien zélèves couma Ibn Abu Zi’b, Ibn Juraij, Ziyaad Bin Sa’d etc. zotte correcte. Donc ça hadice-là li ene hadice authentique ki capave servi comme ene argument et ene preuve. De l’autre coté ena ene hadice de sahih Muslim rapporté par Hazrat Aisha ‎(Radiyallahou anhou‎)‎ ki apparemment donne raison à banne ki faire namaz janazah dans masjid. Selon ça hadice-là, Hazrat Aisha ‎(Radiyallahou anhou‎)‎ ti dimane pou amène janazah Hazrat Sa’d Bin Abu Waqqaas ‎(Radiyallahou anhou‎)‎ dans masjid afin ki li capave faire so namaz janazah. Mais banne Sahaba-e-Kiraam fine trouve ça étrange. Comme justification, Hazrat Aisha ‎(Radiyallahou anhou‎)‎ fine rapporte ene cas selon lequel Rassouloullah ‎(Sallallaahou A'laihi Wasallam)‎ ti faire namaz janazah de Hazrat Souhail Bin Al Baidah ‎(Radiyallahou anhou‎)‎ dans masjid. L’attitude de banne Sahaba-e-Kiraam laisse paraite ki faire namaz janazah dans masjid li pas ti ene pratique normal. Couma li possible pou banne Sahaba-e-Kiraam blié ene kitchose ki ti pé faire tout le temps ? Li paraite bien drôle. Ça montré ki selon la pratique normale et habituelle, namaz janazah ti pé faire en dehors masjid. D’ailleurs selon ene hadice de Boukhari Sharif, ti ena ene place alloué acote masjid Nabawi spécifiquement pou faire namaz janazah. Ça ene deux namaz janazah ki fine faire dans masjid ti banne cas exceptionnel ki ti capave ena banne circonstances et raisons spécifiques. Ene pratique ki fine ena lieu dans banne conditions et circonstances spécifiques pas capave ena ene application générale. Li bizin reste restreint à banne conditions spécifiques. Le principe général concernant namaz janazah c’est faire li en dehors masjid.

D’ailleurs d’après le principe établi par banne fouqaha (juristes) quand ena contradiction entre la pratique et la déclaration de Nabi ‎(Sallallaahou A'laihi Wasallam)‎, alors nou donne préférence à ceki Nabi ‎(Sallallaahou A'laihi Wasallam)‎ fine déclaré parceki ça li concerne entier l’Oummah. Par contre ceki li fine pratiqué, li capave fine faire li pou banne raisons spécifiques dans banne circonstances spécifiques.

D’après ça principe-là, le hadice de Hazrat Abou Hourairah ‎(Radiyallahou anhou‎)‎ selon lequel Nabi ‎(Sallallaahou A'laihi Wasallam)‎ fine déclaré ki « pena récompense ou bien pena narien pou celui ki faire namaz janazah dans masjid » pou ena préférence lors hadice Hazrat Aisha ‎(Radiyallahou anhou‎)‎ ki dire ki Nabi ‎(Sallallaahou A'laihi Wasallam)‎ ti accomplir namaz janazah ene Sahabi dans masjid. Au plus allé nou capave dire ki faire namaz janazah li permette dans certaine cas mais en général li pli bon et recommandé et pli sounnat pou faire li en dehors masjid.

[Extrait de Al Jamiat Vol.6 No.12]