Pou capave ena la paix …

Ou ena même pou suive kikene dans la vie. Ou pas capave dire ou pas fine suive personne dans tout ceki ou faire. Ou battage, ou la coupe et ou look, tous ça-là vine par copié kikene là-dans. Ou pas croire ki ou fine faire ene grand erreur dans choisir ou idéal ? Dans tout domaine dimoune content ceki pli bon. Eski ou satisfait avec façon ki ou pé vive ? Nou pou d’accord ki banne ki nou pé suive comme idéal dans nou la vie, zotte pas banne ki ena Deen dans zotte. Définitivement li ene grand erreur de nou part quand nou quitte ceki pli bon pou satisfait avec ceki pas bon ditout. Li chagrinant pou constaté ki zordi jour de plus en plus nou façon li calqué lors la façon de banne ki sans pudeur. Ki ene dimoune capave attane par suive banne ki sans pudeur apart vine sans pudeur couma zotte même. Parceki ene dimoune li pas suive kikene sans ki li ena ene appréciation et admiration pou li. Admiration pou kikene faire ou trouve bon et appréciable tout ceki li faire quand même en réalité li capave ene kitchose indigne et immoral. Ou ena tendance faire pareille et finalement ou vine pareil couma li. Dimoune intelligent li choisir ceki pli bon. Li suive ene pli bon modèle. Li suive pli bon insaan. Ki sanla ça pli bon insaan-là ? Ça pli bon insaan-là c’est nou Habeeb (bien aimé) et Habeeb-e-Khuda (bien aimé Allah Ta’ala) Sayyidouna Mouhammad ‎(Sallallaahou A'laihi Wasallam)‎. Comme ene musulman ou pas capave pretanne le contraire. Sinon imaan pou sauté. Allah Ta’ala fine présente Nabi ‎(Sallallaahou A'laihi Wasallam)‎ comme Ouswa Hasanah c'est-à-dire ene pli bon modèle. Ene modèle c’est ene kitchose ki fine faire pou suive et pou copié. Donc Allah Ta’ala fine envoye nou Nabi ‎(Sallallaahou A'laihi Wasallam)‎ pou nou suive li et copié li dans entier nou la vie. Eski li pas ene hypocrisie ki nou pretanne content Rasouloullah ‎(Sallallaahou A'laihi Wasallam)‎ mais nou copié ene l’autre apart li ? Ki qualité content ça ki nou pena appréciation et admiration pou li ! Et si nou ena admiration, bé couma nou capave permette nou suive ene l’autre !

Rassouloullah ‎(Sallallaahou A'laihi Wasallam)‎ li pli grand et meilleur insaan. Li même meilleur créature et li même la crème de la création. Pena aukene chemin pou vine ene vrai insaan apart suive ça pli grand insaan-là. Sinon pena vrai insaniyyat dans copié kikene apart li. Bizin ena insaan lors la terre pou capave ena la paix. Et ça li trouve dans suive ça pli grand insaan-là.

[Extrait de Al Jamiat Vol.6 No.14]