Objectif

Pena personne ki vive lors la terre sans ki li ena ene but ou ene objectif. Bon ou mauvais chaque dimoune bizin ena ene but derrière chaque activité ou mouvement ki li faire. Similairement bizin ena ene but derrière tout ceki Allah Ta’ala fine crée. Allah Ta’ala le Créateur Suprême fine crée le ciel. Li fine crée la terre. Tout kitchose fine vine en existence par Allah Ta’ala même. C’est li même ki fine définir l’objectif de ça insaan ki li fine mette li lors la terre. L’objectif de insaan c’est akhirat – ene le monde ki vine après la mort cote tout dimoune pou regagne la vie. La mort lors ça dounia-là li pas la fin de l’existence. C’est plitôt le vrai commencement de ene la vie éternelle. Ene la vie ki chaque insaan pou vive li soit dans souffrance perpétuelle ou bien dans ene bien-être inégal et eternel.

Allah Ta’ala fine mette insaan lors la terre pou li faire zeffort pou bâtir so aakhirat. C’est ça même zeffort ki vraiment louable, valable et appréciable. Tout zeffort ki faire so aakhirat souffert li ene zeffort détestable. Dimoune ki vraiment conscient de so aakhirat pou toujours faire le maximum zeffort dans direction de aakhirat par vive so la vie d’après Deen. Li pou évite tout élément et facteur ki capave handicap so zeffort. Li pou couma dire ene dimoune dans la salle l’examen ki volontairement pas oulé perdi ene point ou la moitié point aussi. Ça ene point ou la moitié point-là li dire boucou pou li.

Ene dimoune ki vraiment content so aakhirat, li pas néglige narien. Li saisi la moindre occasion. Li pas laisse narien perdi. Li tente so chance dans tout façon. Li prend en considération banne tipti tipti point ki capave paraite négligeable et insignifiant. C’est ça ki ranne li de plus en plus prudent. Dimoune capave qualifié ça de l’extrémisme mais si applique Deen sérieusement et minutieusement appelle extrémisme, bé c’est ene qualification ki bizin jalousement adopté, inculqué et préservé.

Faraz, waajib ou sounnat mou’akkadah li pas quitté même. Quitte ene mustahab aussi li considère ça comme ene grand la perte. Coumsa même non seulement li abstenir de haraam mais makrouh aussi li juge li fatal. Ena des fois li préfère quitte banne kitchose ki pourtant permissible zisse acoze ki ça capave débouche vers ceki pas permissible. A ça stade-là li bon conné ki ça l’attitude-là li pas ene façon faire halal vine haraam ki interdit dans shariah mais c’est necque ene moyen pou évite ceki interdit. Ena ene terme ki banne ‘Oulama conne li par ‘haraam lighairihi’ c'est-à-dire ene kitchose ki li halaal en li même mais li capave vine ene moyen pou kitchose ki pas permissible. Donc pena narien ki pas bon dans quitte ene kitchose pareille parceki pas acoze ki ene kitchose li halaal et permissible, alors nou bizin faire li même. Pourvu nou continué considère li halaal et jaiz. Hazrat Ali ‎(Radiyallahou anhou‎)‎ ti pé raze so la tète mais pourtant Nabi ‎(Sallallaahou A'laihi Wasallam)‎ fine garde longue cheveu tout le temps apart ki li ti rase so la tète dans ‘Oumrah et Hajj. Hazrat Ali ‎(Radiyallahou anhou‎)‎ ti tanne Nabi ‎(Sallallaahou A'laihi Wasallam)‎ dire ki ena janabat enba chaque brin cheveu. Donc comme ene mesure de précaution li fine préfère rase la tète pou so propre satisfaction et tranquillité. Par cela li fine envi gagne l’assurance ki narien pas reste sec quand li lave so la tète.

Ene diabétique li évite du sucre. Ene cardiaque li pas consomme la viande rouge. Zotte faire ça pou zotte la santé physique. Et ça li pas interdit ni appelle faire halaal vine haraam. Pena aukene différence entre ça et entre ene personne ki quitte certaine halaal ki li juge li néfaste pou so la santé spirituelle. Nikah li ene kitchose très important dans la vie ene dimoune ki fortement recommandé dans shariah. Ena certaine stage et circonstance cote li capave vine faraz aussi mais malgré ça ena banne ‘Oulama ki autorise reporte li ou bien pas faire li même si li vine ene handicap dans acquisition connaissance de Deen ou la mise en pratique de Deen. Ene dimoune li prend so maximum précaution pou pas gagne zafaire la police ki capave gâte so l’image ou bien ki capave brise so carrière. Coumsa même li prend tous banne mesures ki capave permette li poursuive so carrière avec succès. De la même façon ene dimoune ki vraiment conscient ki so destination finale et so l’objectif principal c’est aakhirat, alors li pas pou laisse narien perdi ki capave contribué efficacement dans so trajet. Laisse banne actions essentielles, banne actions simple aussi li dire boucou pou li. Pena aukene raison pou quitte quand même ene simple action sans ene raison valable quand Nabi ‎(Sallallaahou A'laihi Wasallam)‎ fine dire : لا تحقر معروفا (pas sous-estime aukene bonne action).

Ene personne ki prend aakhirat comme so l’objectif, Allah Ta’ala mette ene sens de l’indépendance dans so le cœur, resoude tous so banne problèmes et dounia-là li rissé li vine acote li. C'est-à-dire succès dans dounia et dans aakhirat li trouve dans prend aakhirat comme objectif principal. Sinon aakhirat-là pou perdi même, dounia-là aussi pas pou gagné. Peut être ça même ki appelle perdi dans bois et dans la cour.

Servi ça dounia-là pou bâtir ou akhirat. Pas suive banne ki fine détruire zotte akhirat acoze ene ti bénéfice temporaire dans dounia.

Ziska preuve du contraire ene l’apparence indésirable li ene symptôme et ene signe de ene déficience et ene l’intérieur malade.

[Extrait de Al Jamiat Vol.6 No.15]