Bien être de la nation

Ene gouvernement li pretanne vouloir le bien être de la nation et en vérité ça même li bizin faire. Pou assume ça responsabilité-là, gouvernement li prend banne mesure nécessaire. Li mette banne la loi pou empêche accident. Ou trouve ena banne camera partout pou surveille banne ki pé roule vite. Nou ena l’hôpital, dispensaire, centre médical, parcours de santé ki garanti nou la santé. Lecol, collège, université etc pou nou l’éducation. Malgré tout ça-là, présence taverne dans ene gouvernement ki pretanne le bien être de la nation li intriguant. Taverne li ene danger pou nou l’esprit. Quand ene dimoune boire so l’esprit li capave faire n’importe ki kitchose. Li vine ene danger pou li même et pou lezot. So la famille et so proche ki souffert plis. Tout ça-là acoze li fine boire ene impureté ki fine débalance so faculté. Li nepli reste li même. Malgré tout ça-là nou autorise ça impureté-là vendé partout. A tel point ki pena aukene sens de l’amusement sans ça impureté-là. Pena l’année, pena picnic, pena l’anniversaire, pena aukene l’occasion de contentement pensable sans ça malpropreté-là.

Couma ene nation capave ena courage appelle li ene peuple admirable quand li pé patouille dans ene impureté ki appelle ‘Mère de tous les vices’ ? Couma nou pou réconcilié entre la volonté du bien être de la nation ki le gouvernement prôné et l’autorisation de ça impureté-là ki débalance tout et ki crée déséquilibre social à tout niveau ! Li très simple pou comprend. Pas bizin alle l’école pou comprend ki quand nou empêche ene mauvais travail, alors nou bizin ferme la porte de tous banne facteurs ki pou occasionne ça mauvais travail-là. Ou pas capave autorise dimoune boire so l’esprit et ou attane ki li pas faire aukene bêtise. La plupart du temps li faire banne bêtise quand li nepli capave raisonné. Bizin faire zeffort pou dimoune capave servi l’esprit. Sinon li pou ene façon pou défaire ceki ou fine faire.

[Extrait de Al Jamiat Vol.7 No.1]