Quitte Sounnat

Quitte ene sounnat de Nabi ‎(Sallallaahou A'laihi Wasallam)‎ li ene kitchose bien bien pas bon. Dimoune capave dire ceki li envie mais ene dimoune ki ena vrai l'amour pou Nabi ‎(Sallallaahou A'laihi Wasallam)‎ li pas quitte sounnat de Nabi ‎(Sallallaahou A'laihi Wasallam)‎. Ou déclare content Nabi ‎(Sallallaahou A'laihi Wasallam)‎ mais ou battage li ene battage ki ou fine copié avec banne kaafir ! Ki logique capave ena derrière ene l'attitude pareille ? Apart nou dire ki ou pas paraite sincère dans ceki ou pé dire.

Malgré combien ou capave empêche ene dimoune ki dans vice mais li pou continué avec so vice. Bien rare ou trouve ene dimoune ki ena vice li quitte so vice acoze dimoune pé critique li. Jamais li pou prend compte ceki dimoune pé dire lors li parceki satisfaire so désir c'est ça même so but et c'est ça même kitchose ki li pli apprécié et pli content. Mais ene dimoune li pas hésité néglige sounnat de Nabi ‎(Sallallaahou A'laihi Wasallam)‎ à peine li tanne dimoune pé critique li. Eski nou pou ena raison si nou comprend ki so désir pou pratique sounnat li bien faible comparé à l'autre-là so désir pou faire so vice? La quantité ene-là fort dans so vice, l'autre-là pas ferme dans so vertu. Normalement c’est ça même ki évident. Sinon banne ki ena vrai l'amour pou ene kitchose, zotte pas cédé à aukene genre de critique. zotte convaincu de ceki zotte faire et zotte pas compromette ni zotte accepté faire kit concession. C’est ça ki parfois amène zotte pou dire:

« Eski acoze banne imbécile mo pou quitte sounnat de mo bien aimé Nabi ‎(Sallallaahou A'laihi Wasallam)‎ ? »

Li pas paraite normal ki ene dimoune li néglige sounnat de Nabi ‎(Sallallaahou A'laihi Wasallam)‎. Bizin ena kitchose ki pas bon et pas tourne rond quelque part. C’est ene symptôme de ene maladie ou ene indication de ene genre de impureté spirituelle. Ene Sahabi li trouve ene personne pé faire khutbah dans posture assizé. Sans hésitation li qualifié li de " khabeeth" (impure). Commentant ça déclaration-là, banne Oulama dire ki sans aukene raison vraiment valable, négligence à l'égard de sounnat li émane apartir ene impureté ki trouve à l'intérieur de la personne. C'est ene palais malade ki empêche ene dimoune dégusté ene bon plat. Ki raison capave avancé pou ene dimoune ki pena appréciation et admiration pou sounnat apart ki so rooh même li malade? Sinon comment ene dimoune capave dire ki li ena admiration pou sounnat mais sans aukene raison valable li pas applique li?

[Extrait de Al Jamiat Vol.7 No.1]