Tahaarat dans namaz

Ene dimoune li bizin ena tahaarat (propreté) complète pou so namaz compté. C'est-à-dire li bizin ena ghusal et wazou tout les deux. Ceki essentiel dans ghussal ceki li bizin mouille entier le corps en sorte ki narien pas reste sec. En sus de ça li bizin gargarisé et mette de l’eau dans narine. En ceki concerne wazou, essentiellement li bizin lave so figure, so deux la main ensam avec coude, faire masah (passe la main mouillé) lors la tète et lave tout les deux lipied ensam avec cheville.

Nou bizin prend compte et reste vigilant quand nou alle faire namaz dans certaine masjid parceki ena masjid ki so imaam li pas lave lipied dans wazou quand li ena chaussette dans so lipied. Li necque faire massah c'est-à-dire passe la main mouillé lors so chaussette. Nou conné ki gagne droit faire massah lors chaussette avec certaine conditions. Mais ça chaussette ki gagne droit-là li ene chaussette spécial ki faire en cuir. Pas gagne droit faire li lors banne chaussette ordinaire ki en nylon ou en coton etc.  Ena certaine imam dans certaine masjid ki zotte pas respecté ça condition-là. Zotte faire li lors chaussette ordinaire. Donc zotte wazou même pas compté. Acoze ça bizin pas faire namaz derrière banne imam pareille. Ene dimoune souciant et responsable li pas capave permette li donne so zenfant en mariage à kikene li gagne le moindre soupçon lors li. Coumaniere ene dimoune ki vraiment content so aakhirat capave agir avec négligence et légèreté concernant so namaz ? Faudré pas nou blié ki premier kitchose ki pou bizin ranne compte c’est apropos nou namaz. Donc nou bizin extrêmement prudent concernant namaz.

Comme ene mesure de précaution, nou bizin évite faire li dans banne masjid derrière banne imam irresponsable ki pas lave lipied dans wazou et zotte contente zotte avec faire masah lors zotte chaussette ordinaire et pourtant ça li pas permette excepté lors banne chaussettes spécial avec certaines conditions.

[Extrait de Al Jamiat Vol.7 No.1]