Deux rakaat avant maghrib

Ena hadice ki dire ki ena 2 rakaat avant namaz maghrib. Et hadice-là li authentique. Normalement c’est deux rakaat namaz ki Nabi ‎(Sallallaahou A'laihi Wasallam)‎ pas fine mette l’emphase. Au contraire li pas fine oulé même ki dimoune prend ça comme ene pratique régulier. Ça capave ene banne raisons ki banne Khulafa-e-Rashideen pas ti pé pratique ça. D’ailleurs Hazrat Abdullah Bin ‘Oumar ‎(Radiyallahou anhou‎)‎ dire ki li pas fine trouve personne faire li à l’époque Nabi ‎(Sallallaahou A'laihi Wasallam)‎.

Apres tout, Nabi ‎(Sallallaahou A'laihi Wasallam)‎ pas ti alloué ene le temps spécial pou accomplir ça. Banne ki ti pé faire ça, zotte ti pé faire li pendant ki azaan pé donné.

Ena banne masjid zordi jour ki zotte façon de faire li pas conforme avec sounnat. Premièrement zotte promouvoir li lors ene base permanent tandis ki Nabi ‎(Sallallaahou A'laihi Wasallam)‎ pas ti envi même ki dimoune prend ça comme principe régulier. Deuxièmement zotte alloué ene le temps supplémentaire pou faire ça à tel point ki zotte faire namaz maghrib ene bon boute le temps après azaan. Troisièmement zotte mette annonce pou faire conné ki ena facilité faire deux rakaat-là dans zotte masjid. Tous ça banne points-là zotte pas conforme avec le principe de Nabi ‎(Sallallaahou A'laihi Wasallam)‎. Nou bizin conné ki attache l’importance avec ene principe plis ki li mérité c’est bid’ah. C’est ça même erreur ki pé arrivé concernant ça 2 rakaat-là.

Ti ena ene l’époque ki ça même banne ki ti minimise l’importance banne sounnat mou’akkadah. Ça l’époque-là, banne jeunes surtout, ti pé contente zotte avec faraz seulement. Mais aster zotte pé attache l’importance et pé mette l’emphase lors ça 2 rakaat-là dans ene façon démesuré. C’est ene débalancement ki ti trouve dans banne khawaarij. C’est manque de l’expérience et sagesse ki amène vers banne débalancement semblable. Acoze ça bizin toujours comprend Deen et applique Deen sous supervision banne sages. Banne sages dans Deen c’est banne fouqaha (juristes) couma les 4 aimmah, Imam Abou Hanifah (R), Imam Malik (R), Imam Shafi’ (R) et Imam Ahmad Bin Hambal (R). C’est ça même banne fouqaha ki conne la vraie portée de ene hadice et le contexte dans lequel li bizin appliqué et la façon ki li bizin être appliqué.

Imam Tirmizi (R) dire :

« هم اعلم بمعانى الحديث »

« C’est banla même (fouqaha) ki conne pli bien signification hadice. » (Tirmizi)

[Extrait de Al Jamiat Vol.7 No.2]