Mouhabbat pou Allah Ta’ala

Mouhabbat ou bien admiration pou kikene li faire ou faire tout pou ça kikene ki ou admire li. Mouhabbat li faire difficile paraite facile. Ena des fois l’impensable vine réalisable.

Quand ene dimoune li content ene kitchose, li faire zeffort pou li gagne li. Si li vraiment content ça kitchose-là, alors li pas guette le temps ni l’argent. Arrive ene stage li blié tout. Li pas trouve narien autour de li. Ene seul kitchose existé pou li. C’est ça kitchose ki li content et li admiré-là.

Ou guette ene jeune fille ki fine fecque gagne so 18 ans. Li content kikene à tel point ki li vine insupportable pou vive sans li. Sans hésitation li quitte le toit familiale pou alle vive avec ceki li content. Li quitte so la famille, so mama papa, so frère sœur, so confort et ziska so Deen zisse acoze ene ki li content. Tout ça-là li faire li avec contentement et avec la joie. Si ça même mouhabbat nou ti ena pou Allah, alors jamais nou ti pou trouve Deen difficile. Nou ti pou subir tout avec la joie et contentement zisse pou ça l’amour ki nou ena pou Rabb. Pratique Deen ti pou vine non seulement facile mais délicieux. L’exemple de banne personnages pieux li devant. Zotte pas fine hésité renonce n’importe quoi que ce soit ki vine ene obstacle pou vine vers Allah Ta’ala. Hazrat Ibraheem Bin Ad-ham (R) fine abandonne so royaume pou gagne Allah Ta’ala. Si kikene capave sacrifié so l’honneur, so dignité, so statut acoze ene cadavre ki pou mort et ki condamné pou vine la poussière alors ki faire ene dimoune pas capave donne tout pou Al-Hayy, Al-Qayyoum ki existé ziska jamais. Ene ki guette nou tout le temps. Ene ki prend nou compte tout le temps. Ene ki donne nou tout ceki nou bizin. Acoze ça banne dimoune vraiment intelligent zotte donne zotte l’énergie, zotte le temps, zotte richesse et tout ceki dans zotte disposition dans le plaisir Allah Ta’ala. Allah Ta’ala so plaisir li trouve dans Deen ki signifié vive la vie d’après commandements Allah Ta’ala. Et le moubarak tareeqah et sounnat de nou bien aimé Nabi ‎(Sallallaahou A'laihi Wasallam)‎.

Ena boucou kitchose ki d’ordinairement li paraite bien difficile mais couma dire mouhabbat li faire difficile non seulement vine facile mais extra délicieux. Si ou vraiment content kikene, eski li pou difficile pou passe la nuit acoze li ? Banne jeunes pé passé même la nuit cri avec la joie et grand plaisir acoze banne kitchose ki zotte content. Ene ki vraiment content Allah Ta’ala li pas trouve li difficile pou levé dans au milieu la nuit acoze so Rabb. Li pas capave expliqué ceki li ressenti dans pose so front dans sajdah divant so Rabb. Ceki li gagné li inestimable. Bé ki li gagné exactement coumsa ? Pli facile ou faire li ou même. Ou pou gagne ene l’idée de ceki li ressenti sans ou pou capave expliqué ceki ou gagné.

"اللهم ارزقنى حبك وحب من ينفعنى حبه عندك" 

« O Allah, accorde moi to l’amitié et l’amitié de ene ki so l’amitié li bénéfique pou moi acote Toi. »

[Extrait de Al Jamiat Vol.7 No.4]