Riya

Nabi ‎(Sallallaahou A'laihi Wasallam)‎ fine exprime so l’inquiétude apropos ene kitchose ki li même li fine qualifié li de Shirk Asghar. Ki été ça kitchose grave ki appelle shirk asghar-là? Nabi ‎(Sallallaahou A'laihi Wasallam)‎ fine définir li par Riya. Riya c’est ene maladie ki faire ene dimoune faire ene travail pou so nom marché. C'est-à-dire li faire ça pou li gagne popularité et pou dimoune flatte li. Par exemple ene dimoune li bizin ena ene l’intention pure et propre quand li pé faire ene bon travail et surtout quand li pé faire ene ibaadat. Li bizin toujours faire li uniquement pou le plaisir d’Allah Ta’ala. Ça même ki appelle ikhlaas ou la sincérité. Aster si li faire ça pou li vine célèbre ou populaire ou pou gagne valeur, l’honneur et grandeur dans lizié dimoune, alors veut dire ça ibaadat-là fine contaminé avec ça virus ki appelle Riya. Ene ibaadat contaminé et infecté de Riya c’est ene ibaadat inacceptable. Allah Ta’ala li rejette ça qualité ibaadat-là. Non seulement li rejeté mais la personne coupable de ça délit-là pou être trainé par so visage et pou être jeté dans l’enfer.

Faire ibaadat pou ene l’autre apart Allah Ta’ala c’est shirk. Et le désir pou être célèbre ou populaire à travers ibaadat c’est Riya. Etant donné ki li ene façon pou associé ene l’autre but dans ibaadat Allah Ta’ala, Rasouloullah ‎(Sallallaahou A'laihi Wasallam)‎ fine qualifié li de shirk asghar c'est-à-dire ene genre de shirk ki ressemblé à véritable shirk.

Ressemblance avec ene kitchose li capave louable ou détestable. Pena péché pli grave ki shirk. Le fait ki fine compare Riya avec shirk, li suffit pou montré le degré très grave de Riya. Sans doute, ressemblance avec shirk pas capave narien apart ranne ene kitchose détestable et dégoutant. Donc Riya c’est ene maladie et ene très vilain manière. Li suffit pou li vine dégoutant et détestable pou la seul et simple raison ki li invalide et annule ene bonne action ki fine capave nécessite boucou sacrifice et volonté pou réalise li. C’est ene virus ki narien pas capave résisté contre ça.

Riya li vine apartir ene kitchose ki appelle Hubbul-Jaah ki signifié content grandeur ou bien le désir de célébrité et popularité. Couma tout maladie, ça aussi li ene maladie ki dimane être traité. Sans ene traitement adéquate et satisfaisant, ene dimoune li continué reste malade spirituellement ki perturbe li et agace li dans so ibaadat. C’est ene virus ki attaque principalement so ikhlaas (sincérité) ki li indispensable pou ene ibaadat accepté. Li couma ene maladie ki neutralise tout banne bon-bon nourriture ki ou consommé. Similairement aukene ibaadat pas accepté dans présence ça maladie-là. Donc c’est ene maladie bien grave ki bizin à tout prix ene bon traitement sinon grand malheur.

[Extrait de Al Jamiat Vol.7 No.8]