Travail tigite, gagne boucou

Dimoune li capave tire tout avec ou mais li pou hésité pou donne ou ene tigite ceki pou li. Malgré ça, dimoune-là continué travail parceki li pena aukene choix apart ça. Et parceki li conne valeur ça ene tigite-là. Acoze ça li accepté subir toute sorte difficulté et passe tout qualité misère.

Par contre Allah Ta’ala li donne bien boucou même pou ene tigite narien ditout ki ene dimoune faire. Mais malgré ça insaan-là li pas intéressé pou faire li. C’est parceki li pas conne valeur ça bien boucou-là. Li couma ça ti zenfant ki galoupe derrière banne fantaisies et ki pas prend compte l’or et l’argent ki capave éparpillé tout autour de li. Nou tous conné ki c’est manque de connaissance ki faire ça zenfant-là agir coumsa.

Ça même kitchose si ene grand dimoune faire li, nou pou qualifié li de bette ou bien imbécile. Mais pourtant ça genre de imbécilité-là nou tout pé commette quand nou galoupe derrière dounia au détriment de nou akhirat parceki nou pé perdi nou bien être eternel acoze ene infime l’avantage temporaire. C’est ene imbécilité ki non seulement ene dernier laboureur ou ene ki pas fine apprane ditout pé commette. Bane détenteurs de banne diplômes et degré depi A ziska Z aussi trouve dans même couloir. Banne B.A, M.A, Bsc, Msc, Phd, banne médecins, banne avocats, banne dirigeants pays, banne l’honorables et banne dignitaires zotte tous capave vine dans la même catégorie. Narien pas indique le contraire à cent pour cent en ceki concerne banne diplômés et qualifiés dans le domaine de Deen. Excepté banne ki donne aakhirat priorité lors dounia. Et ça li bien tigite dans bien tigite.

Ça quantité ki ena dans banne l’hôpital mental, ena boucou plis ki ça en dehors ki fine perdi zotte raisonnement en ceki concerne zotte aakhirat et zotte bien être réel. Ceki endans-là li déchire so linge ki ena lors li et li vine nu mais ceki en dehors-là li faire coude même so l’habillement ki faire li paraite tarzan. Ceki ça banne fou-là faire endans, plis ki ça banne ki en dehors-là faire quand zotte fini boire zotte l’esprit.

Le remède de tout ça-là li trouve dans renforci croyance dans la vie après la mort ki nou appelle aakhirat. Ça renforcissement-là li assuré par reste connecté pendant ene boute le temps avec ene sheikh kaamil. Et ça li aussi réalisable en quelque sorte à ene certaine niveau par sorti dans jamaat en compagnie banne ‘Oulama bien structuré, discipliné et équilibré.

C’est apartir de là ki nou pou commence conne la valeur de tilawat, zikr, tasbeehaat et ibaadat en général. En même temps ça pou permette nou pou commence conne le dégât ki désobéissance faire dans nou la vie.

[Extrait de Al Jamiat Vol.7 No.8]