Hotline

Ti ena l’époque quand li ti non seulement difficile mais impossible pou gagne contacte avec banne dimoune ki ti pé vive dans certaine parti de ça globe-là. Zordi jour nou ena facilité communication. Nou capave contacté dimoune ki nou envi dans n’importe ki l’endroit lors ça dounia-là. Mais si dimoune-là même pas envi cause avec ou, alors là tout moyen communication pou vine inservable.

Tout difficulté ou l’empêchement ki ou capave gagné pou rente en contacte avec kikene, pena narien de ça ki nou zoine quand nou envi contacté nou Rabb. Allah Ta’ala li nou Rabb ki à l’écoute de tout ceki bizin li. Pena aukene l’empêchement pou contacté li. Nou capave communique avec li l’heure ki nou content. Li pas fatigué, li pas dormi ni li bizin repos. C’est ene hot-line ki reste en opération 7 lors 7 et 24 lors 24 sans ene jour de congé et sans ene rupture de ene infime fraction de seconde.

Allah Ta’ala ti ensam avec Hazrat Ibrahim ‎(Alaihis Salaam)‎‎ quand so peuple ti mette li dans difé. Allah Ta’ala ti ensam avec Hazrat Moossa ‎(Alaihis Salaam)‎‎ quand li ti traverse la rivière. Allah Ta’ala même ti ensam avec Hazrat Yousouf ‎(Alaihis Salaam)‎‎ quand so banne frères ti jette li dans puit. Allah Ta’ala ti ensam avec Hazrat Yunus ‎(Alaihis Salaam)‎‎ quand li ti dans vente poisson. Allah Ta’ala ti ensam avec Rassouloullah ‎(Sallallaahou A'laihi Wasallam)‎ et Hazrat Abou Bakr ‎(Radiyallahou anhou‎)‎ quand zotte ti cachiette dans la cave.

« ….. لَا تَحْزَنْ إِنَّ اللَّـهَ مَعَنَا ….. »

« ….. Pas tracassé, sans doute Allah li avec nou … » (V40 S9)

Zotte ti coupé ek tout sans ki zotte ti ena le moyen pou communiqué avec kikene mais ça l’heure-là zotte pas ti ena aukene difficulté pou communiqué avec Allah Ta’ala. Ça la ligne-là li encore opérationnelle zordi aussi et li pou reste toujours en service. Arrête fatigue nou avec banne la ligne hors service ou bien avec tanne réponse bouleversantes et déplaisantes couma : « does not exist » ou bien « ne peut être obtenu ». Laisse nou relié nou avec la ligne Allah Ta’ala lors ene base permanent. C’est là ki nou pou conne la joie de vive.

[Extrait de Al Jamiat Vol.7 No.8]