Négligence lors négligence

Zordi jour nou conné même couma banne jeune été. Avant marié même zotte fini commence amène rôle missié madame. Mais cot ou pou blâme banne jeunes quand banne soi disant grand-là même ena ça manière-là. Si zotte même pé faire li, ça veut dire li pas vaut la peine attane zotte amène banne jeunes-là à l’ordre. Dans ça situation-là ki zotte pou capave faire apart reste tranquille et approuve ceki zotte pé faire par garde zotte silence. L’époque-là même fine vine coumsa cot personne pas capave dire personne narien soit acoze chakene senti li vulnérable acoze so propre comportement ou bien acoze dimoune pas envi gagne problème et pas envi dérange li dans so bien-être. L’essentiel ceki nou tous conné ki ça malpropreté-là pé passé autour de nous.

Plitard banne jeunes-là zotte arrivé commette zotte bêtises et ti fille-là tombe enceinte. Là-dans aussi banne parents-là zotte ena zotte part de responsabilité. Pas conné ki zotte attane pou fini marié zotte ene fois. Zotte capave ena zotte raison mais en général banne raisons-là zotte pas valable ki capave autorise zotte laisse banne jeunes-là vive dans haraam ki zotte ti capave pas laisse arrivé. Aster zotte dimane renseignement. D’après renseignement ki zotte gagné, zotte pas gagne droit faire nikah banne jeunes-là parceki soi-disant si zenfant-là li ene tifille, alors couma dire garçon-là pé faire nikah avec so tifille même. Ça kitchose-là li pas vrai et li pena aukene preuve ki supporte li. Sinon ene missié pas ti pou gagne droit alle dans ménage quand so madame enceinte. Couma sanla pas vrai, l’autre-là aussi pas vrai. Au contraire bizin faire nikah pli vite possible pou zenfant-là vine ene zenfant légitime.

Ene zenfant li légitime quand li né lors au moins six mois après nikah. Si li né dans moins ki six mois après nikah, alors li pas pou légitime. Aster quand nou pas faire zotte nikah et nou attane madame-là accouché pou faire nikah, alors nou fini mette ene tache lors ça zenfant-là avant même ki li vine lors ça dounia-là. Tanque possible nou bizin protège ene dimoune so l’honneur. Acoze ça si arrive ene situation pareil, alors nou bizin fini faire zotte nikah pou zenfant-là vine légitime. Pena narien dans shariah ki empêche zotte faire nikah.

[Extrait de Al Jamiat Vol.7 No.10]