Fatwa et Mufti

Fatwa signifié ene éclaircissement lors Deen. Donne fatwa c’est travail ene mufti. Ene ki pas mufti li pas gagne droit donne fatwa. Donne fatwa sans ene formation adéquate li ene offense et ene délit grave parceki ça capave mette toute ene population dans l’erreur.

Ene personne ki pas fine formé pou traite banne maladies physique li ene danger public ki capave touye dimoune. Coumsa même ene personne ki donne fatwa sans gagne formation ki bizin, li dangereux pou Imaan banne dimoune.

Pou vine mufti, ene personne d’abord li aprane essentiellement Qur’aan, Tafseer Qur’an, hadice, fiqh et principe de fiqh dans ene façon professionnelle avec banne professionnel. Apres ça, li bizin suive ene cours de spécialisation dans jurisprudence pendant ene an à deux ans pou gagne diplôme de mufti. Apres li bizin exerce so domaine sous supervision ene senior pendant ene bon boute le temps avant ki li capave commence donne fatwa.

Ene mufti li toujours reste en contact avec so banne livres. Li pas contente li par guette ene ou deux livres pou donne fatwa. Li vérifié li dans plusieurs livres et cherche l’opinion officielle ki approuvé par banne fouqaha (juristes) avant li donne fatwa parceki ena des fois ena l’opinion ki li ene l’opinion isolé et ki pas approuvé. Parfois arrivé ki ene mufti li donne ene fatwa ki basé lors ene l’opinion isolé et ene l’opinion ki désapprouvé par la grande majorité de banne Ulama. Evidemment ça li pou en contradiction avec le fatwa ki basé lors l’opinion officielle et l’opinion approuvée. Dimoune-là li prend ça pou ene divergence dans l’opinion et conséquemment li prend la liberté pou choisir ceki plaire li. Ça li bien grave et erroné parceki nou accepté ene divergence ki basé lors connaissance correcte de Deen. Quant à ene divergence ki apparaite apartir l’ignorance ou par negligence dans verifié banne sources, c’est l’égarement.

Deen c’est ene grand amaanat. Nou bizin pas faire malhonnêteté là-dans. Ene dimoune ki faire ça travail sensible de fatwa-là, li bizin ene dimoune bien informé et formé sous supervision banne professionnel. Faire ça travail-là sans ça, li ene façon pou massacré Deen. Ça li applique pou tafseer Qur’aan et hadice également. Pas gagne droit faire tafseer ou commente hadice ou explique hadice sans être formé. Banne dimoune bizin prend précaution. Faudré pas mette Imaan et Deen en danger.

Zordi jour nou ena le system guette lors internet pou donne fatwa. Dimoune servi ça moyen-là pou repone banne questions et aussi pou so usage personnel. Ça li empêche la personne faire so propre recherche et tire conclusion ki bizin. Finalement li paralyse li même et li nepli capave ressoude ene problème par guette dans livre. De l’autre coté, ene ki li pas ene aalim, li prend ceki li lire lors internet comme la monnaie content. Et ça faire li refuse croire et accepté banne ulama de so région. Ça aussi li ene problème ki faire chaque dimoune prend li pou ene savant. Chaque dimoune ki ena ene ti connaissance croire ki li capave enseigne tafseer, hadice et fiqh zisse par guette lors internet. Donc zotte tombe dans l’égarement et zotte risse lezot avec zotte dans l’égarement. Et pourtant c’est ene travail bien sensible ki dimane ene formation bien élargie et approfondi avant kikene décide pou faire li.

[Extrait de Al Jamiat Vol.7 No.13]