Fatwa et Qadha

Fatwa c’est ene renseignement lors Deen ki ene Mufti li donné. Normalement fatwa li basé lors version ki présenté devant ene Mufti. Ça version-là li capave vine de la part de seul personne. Ene Mufti li pas nécessaire écoute version tout dimoune ki concerné. Li ena droit tanne la version de ene seul personne et li donne so fatwa. Et ça fatwa-là li pou valable pou la personne ki fine dimane fatwa-là. Mais li bizin pas prend personne so nom. Par exemple si ene madame ena ene question : « Eski mo gagne droit continué reste avec mo missié ki fine donne moi 3 talaaq? » Dans ça cas-là ene Mufti bizin repone dans ça façon-là : « Ene madame ki so missié fine donne li 3 talaaq, li pas gagne droit continué reste avec li. » Mais faudré pas li dire ki ou pas gagne droit reste avec ou missié. Li bizin servi ene formule général. Ou bien li capave dire : « Si vraiment ou missié fine donne ou 3 talaaq, bé ou pas pou capave continué reste avec li. »

Par contre ene Qadha ou ene verdict ki décrété par ene Qazi li ena ene application spécifique. Acoze ça pas gagne droit ranne ene verdict tanque pas fini gagne version de tout ceki concerné. C’est après avoir écoute tous banne parti concerné ki ene Qazi bizin ranne so verdict. Et ça verdict-là li adressé et appliqué à banne ki concerné.

« Afin pou capave bénéficié avec Maulana Ashraf Ali Thanvi (R), bizin ena l’amitié avec li et so banne dimoune et aussi bizin profité par étudié so banne livres. Pou gagne connaissance de Deen par étudié so banne livres et pou gagne amal à travers so banne dimounes. » (Maulana Ilyaas R)

« Le véritable et pli grand zikrullah li trouve dans applique commandements Allah Ta’ala dans tous banne circonstances. Allah Ta’ala fine dire : « O banne ki ena Imaan, faudré pas ou richesse et ou zenfants détourne ou de zikrullah. » Donc ene dimoune ki respecté la loi Allah Ta’ala et ki pas transgresse limite ki Allah fine fixé dans so comportements envers so zenfants et so banne transaction, li considéré comme ene zaakir. » (Maulana Ilyaas R)

[Extrait de Al Jamiat Vol.7 No.13]