Imaamat

Faire Imam ou bien ceki nou appelle faire Imaamat li ene travail ki dimane boucou vigilance et patience. Ene Imam li bizin conne problème de so l’endroit et li bizin conné couma pou remédié li. Apres ça li bizin attane kikene pou critique li. Alors li bizin ena patience. Pena personne ki pas fine gagne critique. Allah aussi dimoune pas fine quitté. Bé cotte nou capave atan ki tous bizin coze de bon pou nou.

Ene Imam li bizin ene kikene ki sérieux dans so comportement parceki li bizin servi ene bon l’exemple pou lezot. Fodé pas kikene trouve li pé faire le contraire de ceki li cozé dans masjid. Ene bon comportement de ene Imam li pèse pli lourd et ena pli l’effet ki so causerie. C’est ene da’wat silencieux mais bien efficace. Par exemple si ene Imam li ene personne honnête ki faire so banne nawaafil dans masjid dans ene bon façon, li faire so tilawat, so douah, so zikrullah, alors li pas bizin coze boucou pou convainque banne muswalli dans so masjid parceki li fine déjà fini accomplir la majeure partie de so mission zisse par so pratique et so comportement.

[Extrait de Al Jamiat Vol.7 No.14]