Vrai ‘Aalim

Ena ene qualité ki ene vrai ‘aalim bizin ena dans li. C’est la frayeur d’Allah Ta’ala. Ene quantité la frayeur ki faire li abstenir de banne péchés et faire li exécute banne commandements Allah Ta’ala. Sinon apart ça, ena boucou ki zotte banne ‘aalim acoze ki zotte fine passe zotte l’examen ‘aalim. Bé ça c’est banne ‘aalim lors papier. Mais fodé pas sous-estime zotte parceki quand même zotte fine faire ene bon morceau. Zisse fine reste pou développe muhabbat et la frayeur Allah Ta’ala. Ça aussi ena so moyen. Et moyen-là aussi li bien efficace. Bizin reste ene bon boute le temps en compagnie ene Sheikh Kaamil c'est-à-dire ene guide spirituel ki fine faire so cheminement sous supervision ene Sheikh et fine bénéficié l’approbation et l’appréciation pou so comportement interne et externe de la part de so Sheikh. Li couma dire ene kikene ki faire so stagiaire ou pupillage ou apprentissage après so l’étude sous supervision ene senior pendant ene bon boute le temps. C’est necque après ça étape-là ki la personne concernée gagne droit pratique so métier et so profession. Et dimoune aussi gagne confiance lors li.

Donc muhabbat et la frayeur d’Allah Ta’ala li développe la sincérité dans ene dimoune. Dimoune vraiment sincère c’est ene personne ki pas hésité pou accepté la vérité. Li accepté banne manquements ki li ena dans li et li faire zeffort voulu pou corrige li. Avec sincérité, tous kitchose vine dans l’ordre parceki li vive pou Allah Ta’ala. Banne vilain manière et bassesse couma la jalousie, vantardise, l’orgueil, la folie grandeur etc. commence éliminé. Li faire li reconnaite banne mérites de so adversaires et li ena l’audace et courage pou désapprouve défauts ki trouve dans banne ki dans so l’entourage et même so bien aimé. C’est ene stage ki ene dimoune vive li necque quand Allah Ta’ala vine so mehboob haqeequi (bien aimé réel). Et li pratiquement impossible sans évolué sous supervision ene Sheikh Kaamil pendant ene bon boute le temps. Li paret drôle pareil couma ene ti zenfant trouve drôle certaine l’attitude de ene adulte ki li tout à fait normal et naturel pourtant.

[Extrait de Al Jamiat Vol.7 No.14]