Société idéale

La connaissance faire ou conne ou droit et ou devoir. Et la sincérité faire ou assume ou devoir avant réclame ou droit. Chaque dimoune pou gagne so droit automatiquement avec facilité quand chaque dimoune conne assume so devoir et so responsabilité. Ene société cote chakene gagne so droit c’est ene société vraiment idéale et prospère. Et ça li réalisable quand chakene assume so responsabilité convenablement. Donc la prospérité li trouve dans promouvoir connaissance de Deen et dans inculqué la sincérité. La sincérité faire ou vive pou Allah Ta’ala. Quand kikene vive pou Allah Ta’ala, li pas ranne personne ditort. Li prend précaution ki personne pas gagne difficulté avec li. Li respecté droit so voisin, so banne collègues dans travail et le public en général. Malheureusement ça banne kitchose-là nepli existé. Cote li supposé existé, là-bas aussi li pas existé dans la façon ki bizin. Acoze ça, ou trouve la guerre et dispute partout. Ou gagne problème lors la rue, dans bazaar et dans travail. Sans oublié ki li pas épargne banne instances religieuses et banne lieux de culte aussi.

En général dimoune de plus en plus pé vine pli égoïste ki sincère. La sympathie, l’affection et la sincérité fine reste zisse pou embellir banne pages et pimente banne discours. Banne simple simple dispute sufi pou brise ene l’amitié de long date. L’amitié-là li roulé zisse quand tout roule normal. Couma ene senti so l’intérêt menacé, c’est l’amitié ki paye le pot cassé. Personne pas rode accepté so tort. Si li conné aussi ki li en tort, li pou toujours ena tendance montré li en raison. Donc couma ene dimoune capave vive en paix dans ene climat pareil ? Eski li pas souhaitable, au moins si nou pas dire obligatoire, ki nou inclure valeurs morales comme ene sujet dans nou syllabus à tous niveau ki li pre primaire, primaire, secondaire ou tertiaires ? C’est ça même sujet ki à certaine niveau capave permette insaan vive avec insaan couma insaan. C’est ça même kitchose ki faire insaan démarque so identité. Sinon li vine pli dangereux et néfaste ki banne zanimaux féroce dans la foret.

[Extrait de Al Jamiat Vol.7 No.15]