Nikah/Talaaq/Iddat

En principe talaaq li détestable. C’est parceki li ene façon pou casse ene nikah ki li ene faveur de coté Allah Ta’ala. Li bien vilain pou tourne le dos avec ene faveur. Alors talaaq li couma dire tourne le dos avec ça faveur ki appelle Nikah. Donc li ene kitchose détestable. En plis de ça, ça rupture-là li crée la haine entre deux personnes et par extension entre deux familles. Ceki banne zenfants zotte subir, li apart. Acoze ça bizin pas donne talaaq.

Mais ça aussi li ene vérité ki arrive banne situations cote li vine difficile pou continué. Alors Shariah fine propose ene moyen pou mette fin à ça relation-là. Et ça li appelle talaaq. Normalement ça situation-là li présenté quand nepli capave respecté droit de so partenaire d’après Shariah. Ena lezot critères et raisons aussi apart ça. Donc bizin guette bien et analyse les pours et les contres avant prend décision. Et li pas de trop si gagne l’assistance ene ki ena connaissance et l’expérience dans le domaine.

Souvent des fois dimoune capave prend décision ki pas bizin quand coup là encore chaud et l’esprit-là li enba lao. Acoze ça bizin pas prend aukene décision dans colère parceki bien tigite ki capave raisonne normal dans colère. Coumsa même ene dimoune bizin pas prend décision dans ene l’état cotte so raisonnement capave affecté et influencé.

Plitard quand fine calculé et fine décide pou séparé, alors li bizin attane pou faire li quand so madame li en état de propreté et li pencore alle dans ménage avec li dans ça l’état de propreté-là. Si jamais li fine fini alle dans ménage dans ça l’état-là de propreté-là, alors li attane li gagne so haiz et vine propre. Là si li pencore change décision, li donne li so talaaq avant li alle dans ménage. Après talaaq aussi li pas bizin alle dans ménage. Li bizin donne li ene seul talaaq. Pas deux talaaq ni trois talaaq.

Madame-là li pou attane ziska ki li gagne trois haiz. Quand li propre après so troisième haiz, li pou sorti en dehors nikah et li capave refaire so l’avenir. Ça attane-là appelle iddat.

Avant ki so trois haiz terminé, so missié ena droit retourne avec li sans faire nikah. Si tous les trois haiz fine terminé et li pas retourné, alors madame-là pou gagne so liberté. Aster li pas pou en droit retourné. Oui si tous les deux d’accord, zotte capave renouvelé zotte nikah et zotte retourne ensam. Ça chance renouvelé-là zotte ena li quand fine séparé par ene ou deux talaaq. Mais pena ça chance-là après trois talaaq.

[Extrait de Al Jamiat Vol.7 No.15]