Doa

Doah c’est ene requête ki rempli de humilité ki ene dimoune faire avec so Rabb. Li présente so banne nécessités, so banne besoins, so banne difficultés et so banne ambitions devant so Rabb. Li dimane so Rabb pou accorde li so banne nécessités et so banne besoins. Li dimane li pou tire li depi banne difficultés ki li été. Li dimane li pou faire li réussi dans banne buts et ambitions ki li ena. Pli ene dimoune humble dans so requête, pli li ena chance être accepté. Humilité c’est facteur pli essentiel dans doah. C’est ça humilité-là même ki faire doah vine l’essence de ibaadat. Acoze ça quand dimane doah, la personne bizin mette dans so la tète ki tous kitchose li trouve dans capacité Allah Ta’ala et li pas trouve aukene part ailleurs. Li bizin considère li ene dernier misérable ki pena narien dans so capacité devant Allah Ta’ala.

Couma ene simple ti kitchose li facile pou Allah Ta’ala, coumsa même ene kitchose ki nou trouve li bien bien difficile aussi li narien ditout pou Allah Ta’ala. Donne par million li pareil couma donne ene ti roupie pou Allah Ta’ala. Acoze ça nou bizin pas hésité pou dimane avec Allah Ta’ala tout ceki nou bizin. Faudré pas nou pensé ki nou pé dimane trop boucou. Faudré pas nou pensé ki nou pé abusé dans dimandé. Nou pas agace Allah Ta’ala quand nou dimandé. Allah Ta’ala li pli content quand nou dimandé et li en colère quand nou pas dimandé.

Banne kitchose facile et simple aussi nou bizin dimane Allah Ta’ala. Faudré pas nou pensé ki kitchose facile pas nécessaire pou faire doah pou gagné. Li paraite ki li dans nou disposition et dans nou contrôle. Mais en réalité narien pas dans nou contrôle sans l’ordre Allah Ta’ala. Donc nou bizin dimane banne simple kitchose aussi pareil couma nou dimane banne grand kitchose. Nou bizin faire doah dans nou banne moments faciles couma nou faire doah dans banne moments difficiles et compliqués. Faudré pas prend doah zisse comme ene dernier recours. Doah li bizin dans entier nou la vie. Dans tous banne moments et dans tous banne situations. Ki sanla capave dire ki ene zélève li passe so C.P.E par so propre zeffort quand même li paraite facile ? Eski necque pou passe B.A ou M.A ki nou bizin aide Allah Ta’ala ?

Li pou ene erreur grave de nou part si nou dire ki travail facile pas bizin aide Allah Ta’ala. Facile ou difficile ou ceki paraite impossible, dans tout nou bizin aide Allah Ta’ala. Sans so aide, travail-là pas faire. Acoze ça Nabi ‎(Sallallaahou A'laihi Wasallam)‎ fine dire ki ene simple kitchose couma lacet soulier aussi bizin dimane avec Allah Ta’ala. Dimandé pas veut dire ki à chaque fois bizin lève la main. Normalement ça li pou difficile et shariah pas fine dimane pou faire ça. Li suffi ki ene dimoune conné et reconnaite au profond de li même ki tout kitchose trouve dans la main Allah Ta’ala. Li bizin faire zeffort mais narien pas dépanne lors so zeffort. C’est Allah Ta’ala ki décidé et c’est Allah Ta’ala même ki donné. Li capave communiqué avec Allah Ta’ala sans lève la main. Mais li bon ki li tire ene le temps pou faire doah par talle la main couma ene mendiant devant so Rabb.

Allah Ta’ala accepté tout ceki nou dimane li. A moins si nou dimane li ene kitchose ki en dehors shariah. Mais ça aussi li vrai ki Allah Ta’ala li accepté nou requête dans différents façons. Parfois li donne nou ceki nou dimane li. Parfois li donne nou ene l’autre kitchose ki pli meilleur pou nou au lieu donne nou ceki nou fine dimandé. Parfois li enlève certaine calamité ou barre certaine difficulté par barakat de ça doah ki nou fine faire. Et parfois li garde ça pou accorde nou dans aakhirat.

Faudré pas découragé. Bizin continué dimane doah. Quand même nou pas trouve narien pé arrivé. Allah Ta’ala conne pli bien ceki nou bizin et li conne ça moment ki li pou pli profitable pou nou.

Parfois nou pas gagne ceki nou dimandé. Mais plitard nou gagne pli bon ki ceki nou ti dimandé. C’est la bonté Allah Ta’ala ki bloque ene kitchose inferieur pou accorde nou ceki pli bon. A ce moment-là ki nou réalisé ki li bon nou pas fine gagne ceki nou ti dimandé. Sinon nou ti pu perdi ça pli bon-là. Le bien être dans la vie li pas trouve seulement dans gagne ene kitchose ki nou dimandé et nou oulé. Ene quantité fois li trouve dans pas gagné aussi. Nou capave ratte ene bus ki bouleverse nou mais plitard nou extra soulagé acoze nou fine tendé ki bus-là fine faire ene accident grave. Ki quantité nou ti pou content avec nou situation si nou arrivé ratte ene vol ki malheureusement fine faire crash ?

Donc parfois succès trouve dans l’échec couma l’échec capave trouve dans succès. Et c’est Allah Ta’ala ki conné li tout seul. Donc c’est Allah Ta’ala so bonté quand li donne ceki nou dimandé. Et de par so bonté même li pas donné ceki nou dimandé parceki li conne pli bien cote nou bien être trouvé. Gloire à Allah Ta’ala ki li généreux dans donné et li généreux quand li pas donné aussi.

[Extrait de Al Jamiat Vol.8 No.1]