Naturel et artificiel

Zordi jour dimoune nepli content la simplicité. Pourtant la simplicité li pli facile et pli accessible. Dans ajouté retiré zotte aile complique ene kitchose ki ti simple parceki dimoune content grandiose ki fatigue li et li complique so la vie. Et ça façon-là li complique la vie lezot dimoune aussi. Li adopté ça grandiose-là dans tous banne domaines. Pena kitchose ki reste à l'abri de ça. Coumsa même li pli ena l'attirance pou artificiel ki naturel. A tel point ki so Deen aussi pas fine capave reste à l'écart de so fantaisies et so l'étalage.

Deen ki ti bizin suive d'après le moubarak sounnat de Rasouloullah ‎(Sallallaahou A'laihi Wasallam)‎ aussi fine vine victime dans l'abattoir de so vice, caprice et so passion. Li pas satisfait avec la simplicité de sounnat. Ça li paraite trop fade pou li. Alors li bizin ajoute impé du sucre ou bien ene tigite disel. Finalement so tension monté ou bien li vine ene diabétique spirituellement.

Ene dimoune intelligent li toujours opté pou la simplicité et pou tout ceki naturel. Artificiel pas capave remplace naturel quand même li capave paraite pli attirant. C'est l'intelligence ene dimoune ki faire li pas attiré vers artificiel. So l'intelligence amène li pou comprend ki maquillage li ene illusion et ene déception. Li pas laisse li gagne embêté. Quant à ene dimoune ki pas assez intelligent, li gagne embêté dans lizour avec maquillage. Li vine ene proie facile pou banne piège de déception. Li maille facilement dans la trappe de grandiose et l'ambiance.

Coumsa même ene personne ki intelligent et sage, li attrape sounnat de Nabi ‎(Sallallaahou A'laihi Wasallam)‎. Li satisfait avec sounnat dans la simplicité. Par contre banne ki manque l'intelligence, zotte fasciné par maquillage de bid'ah. Zotte pas contente zotte avec ceki Nabi ‎(Sallallaahou A'laihi Wasallam)‎ fine enseigne zotte dans la simplicité. Zotte ena toujours ene kitchose pou ajouté. Et tout ça-là arrive par jahaalat (ignorance) ki alimenté de temps en temps par banne soi disant connaisseurs ki pas hésité garde le public dans noir zisse pou zotte l'intérêt personnel. Li tout a fait normal ki ene zenfant li pou attiré vers brillance et éclat de ene métal. Zordi jour le public en général zotte impé enfantin même dans domaine de Deen. Bien tigite dans tigite ki ena habilité pou distingue le sounnah de bid'ah. Dans ene climat semblable, pou faire le public comprend beauté de sounnah ki pas paraite ça attirant- là, li couma dire faire banne jeunes opté dizef ordinaire ki dizef medo. Mais naturel reste naturel et synthétique pou reste so synthétique. Jamais li pou égal à naturel. Coumsa même sounnah dans simplicité pou toujours meilleur ki bid'ah dans grandiose et l'ambiance. Mais c'est necque banne ki ena la sagesse ki pou comprend ça et pou conne évalué so beauté réelle. En d'autre mot, attrape sounnah fort c'est travaille banne ki ena l'intelligence. Sinon l'attirance vers bid'ah et allergie avec sounnah li toujours résultat inévitable de l'imbécilité.

[Extrait de Al Jamiat Vol.7 No.12]