Vertu ranne visite ene dimoune malade

Quand ene dimoune ranne visite ene malade, 70000 farishta faire dua pou li. Allah Ta’ala donne li ene jardin dans jannat. Allah Ta’ala garde li loin de jahannam lors ene distance ki capave couvert dans 60 bananés.

Dua de ene farishta li ene dua dans sure ki pas rejeté. Imagine ene cou ki quantité solide ça dua ki 70000 farishta faire pou été ? Et ça privilège-là ene dimoune gagne li necque par alle guette ene malade ki pas coute boucou le temps. Apart ça, la personne li pou gagne ene jardin dans jannat. Banne dimoune ki dans le domaine ena l’idée exacte de valeur la terre par rapport à région ki ça la terre-là trouvé. La terre dans la ville li ena boucou plis valeur ki la terre dans la campagne. Coumsa même ene ti boute dans centre commercial li capave vaut boucou plis ki ene gros boute la terre agricole. La personne ki ranne visite ene malade li gagne pas necque ene boute la terre mais li gagne ene jardin et ça aussi pas ici lors dounia mais li gagne li dans jannat. Ene boute narien ditou dans jannat li boucou pli valeureux ki ça dounia-là et tout ceki ena là-dans. Ça capave donne nou ene ti l’idée de la valeur de ça jardin-là ki trouve dans jannat. Li pas arrête là-même. En plis de ça, Allah Ta’ala garde li bien bien loin de jahannam. C’est ene façon pou dire ki li pou être protégé de l’enfer. Ou bien li vine dans la liste de banne ki pou alle dans jannat. Mais nou bizin mette dans la tète ki ça mérite-là ene dimoune pou mérite li zisse quand li faire ça pou faire seulement Allah Ta’ala plaisir. Li faire ça zisse pou Allah Ta’ala.

Quand nou faire pou Allah Ta’ala, nou bizin faire kitchose ki permette et dans la façon ki bizin faire li. Par exemple si ou ranne visite ene tifille ki malade acoze ki li ou fiancée, alors ça li pas permette. Donc ou pas pou gagne ça récompense-là. Au contraire ou pou gagne péché. Parceki fiançailles li pas ranne ene tifille halal et légale pou ene garçon.

Pou gagne ça récompense-là nou bizin ranne visite ene dimoune ki nou gagne droit ranne li visite d’après Shariah. Coumsa même nou pas gagne droit ratte namaz pou faire li parceki namaz dans so l’heure li pli important. Li bête pou néglige ene kitchose bien important acoze ene kitchose ki moins important.

Ceki essentiel dans tout ça-là c’est ikhlaas ou bien ceki nou appelle la sincérité. Ene dimoune sincère c’est ene kikene ki motivé pou faire ene action zisse pou faire Allah Ta’ala plaisir. Ene simple action ki faire avec ene l’état d’esprit semblable couma avance ene ti piquant depi lors chemin li capave servi ene moyen pou gagne jannat. Sinon donne la vie dans champ de bataille aussi pas pou vaut narien apart jette ene dimoune dans l’enfer.

[Extrait de Al Jamiat Vol.8 No.2]