Who can be who 4 U !!!

Ene missié li marié avec ene madame. Ça missié-là li ena ene garçon avec so premier madame et ça madame-là aussi ena ene tifille avec so premier missié. Eski ça garçon-là capave marié avec ça ti fille-là ? D’après Shariah zotte gagne droit marié parceki zotte pas frère sœur. Ni zotte papa ene et ni zotte mama ene. Ça montré ki ça ti fille-là bizin faire pardah avec ça garçon-là.

Ene jeune fine marié avec ene madame. Madame-là ena ene nièce. Ça jeune-là so papa capave marié avec ça nièce-là pareil couma missié-là capave marié avec madame-là et so garçon marié avec madame-là so nièce.

Ene jeune fine marié avec ene madame. Madame-là ena ene tifille. Ça jeune-là so papa ena droit marié avec ça ti fille-là.

Coumsa même quand ou dire kikene kala, sœur ou frère, alors ça dire-là pas faire li vine ou kala, sœur ou bien ou frère. Li continué reste ene étranger et bizin observe pardah. Si jamais ou fine appelle li sœur, alors ça pas empêche ou marié avec li parceki li pas ou sœur. De coté Sharia pena aukene l’empêchement. Ou capave pas marié si ou pas senti ou à l’aise. Mais li halal et li permette. Donc ki sanla ou papa, ki sanla ou maman, ki sanla ou frère, sœur ou bien ki sanla ki été pou ou, tout ça-là Shariah ki décide ça. Pas nou ki décidé.

[Extrait de Al Jamiat Vol.8 No.2]