Hadice authentique

Ene hadice li pas nécessairement rapporté dans ene livre particulier et spécifique pou li être qualifié de authentique. Ena banne critères ki ene hadice bizin satisfaire pou capave considère li authentique. D’abord bizin guette so chaine de narration. Si tous banne narrateurs dans so chaine de narration zotte authentique et pena aukene omission ou interruption, alors en principe nou pou appelle li Saheeh ou bien authentique.

Ene hadice Saheeh ou authentique li pas ene hadice ki trouve necque dans Saheeh Boukhari ou bien Saheeh Muslim. Li capave trouve dans ene l’autre livre apart ça deux livres-là. Li capave trouve dans banne livres couma Abou Dawood, Tirmizi, Nisaï ou Ibn Majah ou bien dans lezot livres hadice pourvu ki so sanad ou so chaine de narration bizin bon.

Parfois ça aussi capave arrivé ki ene hadice li paraite ene hadice faible de par so chaine de narration mais banne ‘Ulama dans l’époque de banne Tabeines et Taba Tabeines fine accepté li. Le fait ki banne ‘Ulama dans ça banne l’époque-là fine accueil li favorablement li ene indication claire ki ça hadice-là li fondé. Donc ça hadice-là li vine authentique. Couma parfois nou capave trouve ene hadice ki paraite bon de par so sanad mais banne ‘Ulama pas fine considère li. Le fait ki banne ‘Ulama pas fine considère li, li ene indication ki ça hadice-là bizin ena kitchose pas normal et pas dans l’ordre. Donc nou pas prend ça hadice-là.

Ça aussi li ene principe établi d’après banne savants dans le domaine de hadice ki quand ene Mujtahid couma Imam Abou Hanifah, Imam Malik, Imam Shafi’ ou Imam Ahmad Bin Hambal ou bien encore lezot ‘Ulama ki fine atteine le rang de Mujtahid presente ene hadice comme preuve, alors ça signifié ki ça hadice-là li authentique d’après ça Mujtahid-là.

Quand nou dire ene hadice authentique ou bien ene hadice faible, alors ça li vine de la part de banne célèbre ‘Ulama dans le domaine de hadice. Li pas ene kitchose ki vine de la part de Rasouloullah ‎(Sallalaahou Alaihi Wasallam)‎. Ça li basé lors l’opinion de banne ‘Ulama. Alors acoze ça capave ena divergence concernant position ene hadice. Ene hadice li capave ene hadice authentique d’après ene ‘Aalim mais ça même capave bien faible d’après analyse ene l’autre.

Nou bizin mette ça bien dans nou la tète ki banne Muhadditheen (savants dans le domaine de hadice) zotte pas hasardé dans zotte analyse. Zotte bien méticuleux dans zotte recherche et analyse et zotte verdict. C’est ene ki ena bien l’audace même ki capave dire ki un tel ou un tel Imam fine faire erreur dans so analyse. Ça banne Imam ki nou pé causé-là zotte pas banne Imam ou ‘Ulama de nos jours. Nou pé dire ça sans manque du respect pou banne Imam et banne ‘Ulama de nos jours. Nou pé zisse faire ça différence-là pou dimoune pas sous-estime banne Imam et ‘Ulama couma les 4 Imam et banne ‘Ulama en général de ça l’époque-là. Tout ça-là arrivé quand dimoune pena connaissance ou bien ene ki fine apprane mais li pas maîtrise so dossier. Ça même manque de maitrise ki faire certaine gradué dire: « ça li ene hadice Maqbool (acceptable) parceki ena ene narrateur Majhool (inconnu) dans so sanad. Acoze ça li ene hadice faible. » Ou trouvé hadice-là acceptable acoze ki ena ene narrateur inconnu ! Pas fini. Li ene hadice faible acoze ki li Maqboul (acceptable) !!!

Si gradué pé faire banne dérapage coumsa, bé banne pipeurs sans connaissance ki pou faire. Donc c’est ene domaine bien compliqué. Bizin prend boucou précaution et porte attention avant dire kitchose.

[Extrait de Al Jamiat Vol.8 No.4]