Ici ou bien la haut

Faudré pas ou pense pou faire dominere avec kikene acoze ki ou croire ou ena la force plis ki li. Chaque kitchose ena ene limite. Ou la force aussi li ena ene limite cote li arrêté. Ena ene commencement pou ou la force et ena ene la fin aussi. Ene jour pou arrivé quand ou banne grand cozé ki ou ti pé cozé pou disparaite. Li pas acoze ki ou pou blié ceki ou ti été et ceki ou fine faire mais acoze ki ou pas pou ena la force pou faire li.  C’est ou chance si ou pas subir ceki ou fine faire dimoune subir. Si jamais arrivé dimoune faire dominere avec ou, alors avec ki la bouche ou pou dire ki dimoune pé faire dominere avec ou ?

Ene camarade li capave subir avec kikene ceki li fine faire avec so camarade. Si ou fine faire traite avec kikene, ou bizin atane pou passe là-dans ene jour. Ene belle-fille bizin atane pou subir avec so belle-fille ceki li fine capave faire avec so belle-mère. Et si jamais pas arrive narien, bé bizin pas croire ki pas pou ena narien. Ou capave blié mais Allah Ta’ala pas blié :

وَمَا كَانَ رَبُّكَ نَسِيًّا

« Et jamais to Rabb li blié » (V64/S19)

Donc bizin conne servi ceki Allah Ta’ala fine accorde nou. Bizin servi ça pou le bien-être de l’humanité. Ou la force capave servi pou bâtir couma li capave servi pou détruire ou démolir. Bizin servi li dans ene façon ki li bénéfique et profitable et ki laisse l’humanité respiré dans ene atmosphère rempli avec la paix et l’harmonie.

Dimoune ki faire dominere avec so la force bizin calculé ki li aussi li ena zenfant et ene famille ki li pas en mesure protège zotte partout. Et disons li capave faire li bé ziska quand ? Faudré pas nou blié ki pou bizin ena so répercussion. Ceki nou faire dimoune, nou pou bizin subir so conséquence ici même ou bien la haut dans aakhirat. Dimoune ki pense so aakhirat, li dresse so la vie lors la terre. Ici ena ene quantité moyens pou sappé mais dans aakhirat narien pas pou sappé. Là-bas pou ena ene Allah ki pou faire jugement cote chakene pou gagne la justice. Personne pas pou capave cachiette la vérité ni pou capave coupé tranché et ni kikene so l’influence pou travail.

[Extrait de Al Jamiat Vol.8 No.6]