L’intérêt personnel

Ou donne dimoune difficulté acoze ou facilité. Ene l’autre dimoune aussi li capave donne ou difficulté acoze so propre facilité. Et normalement ça même arrivé partout. Bien rare dimoune pense le bien-être de so prochain. Et ça même façon li crée ene quantité problème. Ça manière chakene rode so facilité sans prend compte problème so prochain, li ene l’attitude ki vine apartir l’égoïsme.

Problème ki nou ena à plizir niveau, li capave resoude zisse si nou remédié ça maladie ki appelle l’égoïsme. Shariat recommane pou acquitté de ou devoir et responsabilité avant réclame ou droit. C’est ene formule, si applique li convenablement, li capave garanti l’harmonie et la paix dans la société. Mais ça maladie-là fine infiltré partout. Le course ki existé dans tous banne pays li ene résultat de ça même maladie. Si ça groupe ki pé organise-li là ti prend compte ki ditort ki zotte pé faire à l’humanité en general, zotte ti capave mette ene terme avec ça. Mais maladie-là trop fort. Nou raisonnement fine arrête fonctionné couma bizin. L’égoïsme présente ene tas justification pou ceki nou pé faire. Li faire nou dévide ene quantité poche pou rempli poche de ene groupe infime. Dimoune alle dévide ceki li fine capave travaille pendant ene semaine ou ene mois dans ene seul jour. Ziska là nou capave dire li encore bon malgré li bien grave mais zistoire-là pas termine là même. Li ena so banne l’effets néfastes, banne bavures et banne implications sévères. Dimoune li fini so casse dans le course mais pas acoze ça li pas pou rejoué. Li prend prêté et après li pas rendé. Si li envi rendé aussi bé comié dimoune li pou rendé ? Li doit ene tas dimoune et tous pé rode li. So madame passe misère et banne zenfants pas gagné ceki zotte bizin. Pencore paye delo, électricité et ni location. La cour condamne li sans prend compte ki tout ça là fine arrivé acoze li fine perdi so casse dans le course.

Ene motocycliste tombe depi lors motocyclette et gagne fracture crane et li mort. L’autorité trouve la nécessité passe la loi faire tous motocycliste mette helmet. Mais casino, le course et jeux de hasard pou continué bénéficié bénédiction l’autorité malgré tous ça banne degrés et ditort ki li faire à la société en général !

Ene dimoune li capave vanne so conscience zisse acoze certaine bénéfice ki li gagné de la part de certaine groupe ki au pouvoir. Li faire ça sans prend compte la compétence et la performance de ça parti là. En faisant cela, non seulement li vanne so conscience acoze so l’intérêt personnel mais li bouleverse ene le peuple et ene pays en général. Ça même façon égoïste ki ouvert chemin pou banne ki pas compétent servi la monnaie pou vine au pouvoir. Ça même ki faire tendance public faire ene virage de 180 degré du jour au lendemain et ki faire banne incompétent vine à la tète du pays.

Ça maladie-là li tellement fort ki li faire dimoune marche lors cadavre dimoune. Acoze l’intérêt personnel ça aussi dimoune pas hésite faire li. Tous les jours nou trouve nou banne jeunes pé mort. Ça pé faire banne mama papa et la famille entier souffert. Mais dimoune ki pé touye nou banne jeunes avec zotte la drogue, zotte reste insensible à ceki pé passé dans la société.

Ene dimoune li ena droit pense so l’intérêt et so l’avantage mais fodé pas li faire li par prive lezot de zotte droits. La prospérité, la paix et l’harmonie pou vine dans la société quand dimoune commence acquitté de so responsabilité et so devoir avant réclame so droit. Le contraire pou ranne dimoune de plus en plus égoïste ki capave être considéré comme la base même de banne structures et systèmes néfaste ki nou pé témoigné dans la société.

[Extrait de Al Jamiat Vol.8 No.6]