To ene esclave

Eski to conné ki to été? Tout ça tapage ki to faire là. To capave ene ministre, premier ministre, président ou ene le roi. To capave n'importe quoi. Mais eski to conné ki to ene esclave ? Tou ça patron ou bourgeois ki to déclaré-là mais to pou reste toujours ene esclave. To pou vive couma ene esclave et to pou mort comme ene esclave. Jamais to pou capave libère toi de ca esclavage-là. Aster reste à savoir ki qualité esclave to été. Si to pas ene esclave pou Allah, alors to pou bizin ene esclave quelque part pou kikene. To pou bizin ene esclave pou to banne passions, to banne désirs et to banne vices. Si ena même pou vine esclave, bé ki faire bizin vine esclave pou ene esclave ? Ki faire vine esclave pou ene esclave ki faire toi vine ene dernier esclave ? To ti croire to ene dimoune libre quand to vive to la vie couma gagné ? To dans l'erreur. To fine empire les choses. To fine tombe dans la bassesse pou vine ene dernier esclave pou ene esclave. Acoze ça si ena même pou vine esclave, vine esclave de ene ki pas esclave. Ene ki li même le Vrai Patron. Ene ki li indépendant de tout. C'est Allah Ta'ala, le Maitre de l'univers. C'est ene esclavage ki donne toi le gout de la vie. Ene esclavage ki accorde toi la vrai dignité. Ene esclavage ki tire toi depi dans impureté et mette toi dans la propreté. Ene esclavage ki tire toi depi dans noireté et mette toi dans l'éclairage. Acoze ça même tous banne dimoune vraiment intelligent fine choisir pou vine so esclave. Esclave ene Allah ki pena narien couma li.

[Extrait de Al Jamiat – Vol. 6 No. 8]