Réflexion

Trahison

Si ou pé souffert acoze ki ene ou bien-aimé fine faire traite avec ou, alors ou bizin calculé ki quantité trahison ou fine commette envers Deen et envers ça l’engagement ki ou fine prend avec Allah Ta’ala. Ki quantité ou fine mal agir avec sounnat et l’enseignement de nou bien-aimé Nabi ‎(Sallallaahou A'laihi Wasallam)‎. A la fois ça li pou allége ou souffrance et pou donne ou l’occasion pou vine de plus en plus sincère envers Allah Ta’ala et Rasouloullah‎ (Sallallaahou A'laihi Wasallam)‎.

La guerre acoze la terre

Ala zot pé la guerre

Acoze ene ti boute la terre

Mais sans manqué sans erreur

Ene jour nou tous pou vine la terre

La terre pou reste so la terre

Personne pas fine mange la terre

C’est la terre ki mette la guerre

Et la terre même pou termine la guerre.

Paroles en or

Quand ou pas trouve aukene manquement dans ou, ça li déjà ene grand manquement.

Pena succès sans obéir Allah Ta’ala et sans suive principe Nabi ‎(Sallallaahou A'laihi Wasallam)‎.

Sounnat Nabi ‎(Sallallaahou A'laihi Wasallam)‎ c’est ene beauté. Assez ranne ou la vie miké par suive lezot.

Succès trouve dans Deen

Quand musulman pou comprend ki bizin mette ene pose avec traîne de la vie ki nou pé amené. Eski bizin monte lors montagne pou trouvé ki ena ene plan bien calculé à tout niveau pou faire musulman éloigné de so Deen ? Ziska l’heure musulman pas fine arrivé comprend ki so succès trouve dans Deen. Eski parole Allah et so Rasoul ‎(Sallallaahou A'laihi Wasallam)‎ pas sufi pou convaincre nou ? Donc ki nou pé attane pou agir et vine vers Deen ki garanti nou salut dans dounia et dans aakhirat.

Autocritique - Dans ki façon nou bizin pensé?

"Mo ene humain. Mo ena mo banne défauts couma mo ena aussi banne bon coté. Mo doit Allah Ta'ala pou ça banne bon coté-là et mo remercié li sans ki mo sous-estime banne ki pena li et sans ki mo mette moi dans rang vis-à-vis lezot. Mo regrette banne manquements et banne défauts ki mo ena et mo dimane Allah Ta'ala protection. Mo bizin faire le maximum zeffort pou débarrasse moi de ça banne manquements-là."

Après Quarante

Après Quarante,

Ou dans la pente.

La montée fine fini,

Astere ou dans la descente.

[Extrait de Al Jamiat Vol.3 No.9]

Pas lève ek miroir-là

Pou ou trouve banne tache ki ena lors ou visage, ou bizin guette ou dans ene miroir. Mais si ou trouve kit défaut, pas bizin lève ek miroir-là au lieu tire banne tache-là depi lors ou visage. Parceki défaut-là li trouve dans ou. Si ena pou lève contre kikene, ou bizin lève ek ou même. Miroir-là fine ranne ou service quand li fine montré ou ceki ena lors ou visage. Perna aukene défaut dans miroir-là. Coumsa même si kikene attire ou l'attention lors ene défaut et si arrivé ça défaut-là li trouve dans ou, ou bizin reconnaissant envers ça kikene-là.

Syndicate content